Mga barko 'langay og dunggo karon

Seguradong masinati ang kalangan sa pagdunggo sa mga pasahero sa barko sa mga pantalan sa Sugbu karong buntag.

Kini nunot sa pagsirado sa Mactan channel sugod sa alas 7 hangtud sa alas 9 karong buntag aron paghatag og kahapsay sa fluvial parade sa kapistahan ni Senior Santo Niño.

Matud pa ni Cebu Coast Guard station commander Manolito Malig-on nga mokabat sa usa ka gatus ka barko ug uban pang sakayan sa kadagatan ang moapil sa parada.

Ang Coast Guard nakarehistro na og 66 ka sakayan sa kadagatan kagahapon apan sumala pa ni Malig-on nga dunay moapas lang sa pag-apil nga dili usab nila mahimong did-an sa pag-apil sa parada.

Giawhag ni Malig-on kadtong mga moapil nga sakayan sa kadagatan nga wala marehistro nga mosunod lang sa lagda nga ilang ipatuman aron mahimong hapsay ang parada.

Walay dagkung kausaban sa han-ay sa parada karon itandi sa niaging mga parada.

Sumala pa ni Malig-on nga ang kausaban lang mao nga ang mga gagmay nga sakayan sa kadagatan ang ilang paunahon sunod sa sakyan sa imahen ni Sr. Sto. Niño samtang magsunod ang dagku nga sakayan.

Laing kausaban mao nga dili na nila pasakyon sa mga bangka ang mga bata nga nagpangedaron ubos sa 12 anyos aron dili mabutang sa peligro.

Kagahapon, ang mga tinugyanan sa Cebu Coast Guard namutang na og marker ug boya nga maoy subayon sa parada karong buntag.