BOPK maghulat una sa kontra mosang-at COC

Paabuton una sa Bando Osmeña Pundok Kauswagan (BOPK) nga makaporma ug makasang-at sa ilang kandidatura ang pundok oposisyon una pa sila moduso sa ilang certificate of candidacy alang sa pagpapili og balik sa eleksiyon karong bulan sa Mayo.

Matud ni Mayor Tomas Osmeña, tsirman sa BOPK, hangtud karon wala pa nila ma-finalize ang kinatibuk-ang line-up alang sa pagka konsehal tungod kay na-bisi kaayo sila karon niadtong bag-o lang natapos nga Asean Summit ug sa pagpahigayon sa Sinulog Mardi gras karong Domingo.

Apan gipadayag ni Osmeña nga makumpleto na ang ilang line-up sa mosunod nga mga adlaw hulip niadtong mga konsehal nga mapupos na ang termino karong tuiga.

Nasayran nga anaa na sa ikatulo ug katapusang termino sila si Konsehal Jocelyn Pesquera ug Procopio Fernandez, samtang si Konsehal Gabriel Leyson nakahukom na nga magpapili pagka mayor didto sa siyudad sa Talisay.

Gibutyag ni Osmeña nga susama sa ilang gihimo sa mga milabay'ng eleksiyon, gitakda silang moduso sa ilang certificate of candidacy unya na sa katapusang adlaw sa deadline sa filing karong Marso 29.

Nasayran nga hangtod karon pabiling wala pay klaro nga mipatim-aw nga kandidato sa oposisyon nga moatbang kang Osmeña ug bise mayor Rama sa BOPK gawas lang kang kanhi Cebu City Sports Commissioner Jonathan Guardo nga mipadayag nang moatbang kang Kongresista Antonio Cuenco sa South district.

Apan padayon karong gihulma ni Guardo ang bag-ong pundok sa oposisyon nga pagatawgon nga Tribu Guardo nga moatbang sa BOPK sa umaabot eleksiyon.