FTPs sa CPPO hataga'g break

Hatagan og kahigayonan nga makasuroy-suroy ang mga Field Training Police gikan sa Carraga Region nga gi-augment isip tigpatunhay sa kahapsay ug kalinaw sa nagmalampuson nga Asean Summit nga kasamtangan karong nagpabilin dinhi sa Sugbu.

Kini ang gipahibawo atol sa press conference kagahapon sa buhatan ni outgoing Provincial Director sa kapolisan sa probinsya sa Sugbu P/ Sr. Supt. Vicente Loot human niya gipatawag ang 45 sa 80 ka mga FTP gikan sa Carraga Region nga gidistino sa nakalabay'ng Asean Summit diha sa Cordova, South Bus Terminal ug Provincial Capitol.

Si Loot nagpasalamat sa tanang mga FTP sa ilang gihimong sakripisyo, pasensya ngadto sa katawhang Sugbuanon nga milampos ang Asean Summit nga walay nitumaw nga dagkong mga panghitabo bisan pa man sa hulga sa mga teroristang pundok dinhi sa Central Visayas.

Gibutyag niya nga mohimo siya'g rekomendasyon alang sa mga FTP nga usa sa mahatagan og Presidential Citation Budget ug iyang iduso ngadto ni Chief Supt. Silverio Alarcio Jr. sa PRO 7.

Matud niya iyang tagaan og break ang 80 ka mga FTPs sa Carraga Region nga walay trabaho ug makalaag sa bisan asang lugar dinhi sa probinsya sa Sugbu basta magtinarong lang sila hangtod nga mouli karong Lunes sa gabii.

Apan sa dili pa kini manguli adunay pagahimuon ang CPPO karong umaabot Lunes nga usa ka "boodle fight," kaon sa tanang mga polis nga sakop sa CPPO nga susama sa gihimo sa PRO-7 sa miaging adlaw.

Suma pa ni Loot inig ka Lunes sa gabii ilang ihatod ang mga FTP sa pier nga molarga na paingon sa Carraga ug tukaran kini og "banda".

Matud ni Loot nga iya kining gihimo aron mahatagan og igong pagtagad kay sa pag-abot sa FTP dinhi Sugbu sa nagsingabot nga Summit wa mahatagig maayong pagdawat kanilang mga kadagkuan sa kapolisan tungod kay niabot nga by batch sila.

Dugang pang Loot gumikan sa Asean Summit ang mga FTP duna gyuy daghang nakat-onan sa ilang training unsaon nila pag-ila sa terorista nga kadudahan og linihokan.

Gani usa sa ilang nakat-onan mao ang Intelligence monitoring pagpaniid ngadto sa katawhan.

Gihulagway ni Loot nga ang mga FTPs nahimong instrumento ug modelo sa mga Cebuanos.

"Kompara sa assignment mas advantage mi diri lahi sa uban namong mga kauban nga naa gibutang sa beat patrol, unya daghan kaayo ming nakat-onan sa among training, usa pod ang pag-atiman sa katawhan," asoy ni PO1 Simon Buyante, usa ka FTP sa Carraga Region ug kasamtangang nadistino sa Operations sa Cebu Provincial Police Office dihang gikuhaan og reaksyon sa Banat News kagahapon.