Faith Healer nadkpan sa CIDG-7 kay nangrekrut

Usa ka bantogan nga faith healer gidakop sa Criminal Investigation and Detection Group-7 kagahapon human pasanginling ilegal nga recruiter sukad pa niadtong milabay'ng tuig.

Si Ronald Lalican Waskin, 27, lumad nga taga Sitio Trese, Lunas sa lungsod sa Asturias gidakop atol sa gihimong entrapment operation sa grupo ni Chief Inspector Rex Derilo diha sa dalan Dela Montaña sa Mabolo sulod sa panimalay sa mga higala sa mga biktima.

Si Waskin nabantog kaniadto nga si "Kokoy the Wonder Boy" nga taga Tisa, kinsa migamit sa espiritwal nga pagpanambal ug nangangkong giniyahan siya sa Balaanong Batang si Sr. Sto. Niño atol nga duna siyay tambalan.

Misikat siya isip espiritwal nga mananambal dihang gi-feature siya sa programang "Balitang K" ni Korina Sanchez kaniadto diin giingong natambalan niya ang balatian sa maong TV host.

Si Waskin gipasanginlang miilad sa siyam ka mga babaye ug lalaki nga buot makatrabaho sa Singapore isip mga production workers ug sila gipabayad og P20 mil matag usa aron sila makalarga, gipasaligan silang mosweldo og P50 mil matag bulan.

Ang mireklamo mao sila si Epe Lanoy, 30 kinsa nakabayad og P8 mil, Sarah Estrera, 28, nakahatag og P8 mil; Shirley Madela, 25, mibayad og P21 mil; Nida Sotto, 30, gipangayoan og P21,550 ug Marichou Cruz, 28, gisingil og P21,550.

Dugang sa mireklamo kaniya mao sila si Dioscoro Aguilar kinsa usa ka Electronic Communications Engineer kinsa gisaaran usab og trabaho sa maong nasud ug gipangayoan og P14,250; Eric Jumaoas gipangayoan og P20 mil; Ediliz Laresma, gipangayoan og P14,250 ug Reno Taganele kinsa gipabayad sad og P12 mil.

Usa sa mga reklamante nga si Aguilar wala makapugong sa iyang gibati ug nasumbagan gyud si Waskin atubangan sa media ug mga polis. Si Aguilar nagkanayon nga duna siya'y tulo pa ka buwan nga anak ug mao ra kadto ang gisaligan niyang matrabahoan.

Sagad sa mga biktima duna nay mga trabaho apan mi-resign tungod sa pasalig ni Waskin. Si Jumao-as maoy unang gipasaligang makalarga na sa Singapore niadtong milabay'ng buwan sa wala pa ang Pasko apan hangtud karon wala kini makabiya.

Matud pa sa inahan sa usa sa mga biktima nga si Alicia Laresma, misalig sila kang Waskin tungod sa pagka-spiritwal niini nga mananambal hinungdan nga nakabayad gyud siya niini aron lang makatrabaho ang anak ngadto sa maong nasud sa barato nga bayad.

Apan ning bag-uhay lang namatikdan nilang ang resibo sinuwat lang sa papel ug usahay typewritten nga pinirmahan sa aplikante ug ni Waskin, dihang gipangitaan asa na ang ilang mga dokumentos mangangkon kini nga giproseso pa kini sa Philippine Overseas Employment Agency (POEA).

Gikatahong mamugos si Waskin nga pabayron sila sa ilang mga kuwang tungod kay giingong gipangayo na kini sa tag-iya sa ahensya nagrekrut apan tungod sa pagduda ni Laresma iya nang gisubay ang POEA.

Matud pang Laresma nga dili rehistrado ang ahensyang Singapore-Philippines Direct Operating Agency nga gipanag-iya sa usa ka Virgie Miyoki ngadto sa POEA ug duna kini pending nga reklamo gihapon sa illegal recruitment sa Asturias.

Si Waskin sa pakighinabi sa Banat News kusganong mihimakak nga peke ang maong ahensya ug nangangkon nga igo lang siya naghikay sa mga trabahanteng buot mangaplay.

Nasuta usab nga ang contact number sa ahensya nga gihatag ni Waskin dili na matawgan sa mga biktima hinungdan nga mireklamo sila sa CIDG7.

Atol sa pagsusi sa ultra-violet light giingong positibo sa pulbos sa entrapment money ang kamot ni Waskin timaan nga gidawat niya ang P2 mil nga salaping gibayad nila ni Lanoy ug Estrera.

Si Derilo mitug-an nga pasakaan nila si Waskin og kasong large scale illegal recruitment nga paglapas sa Akta Republika 8042 kon Migrant and Overseas Filipino Workers Act.