DPWH motugyan sa mga lamp post

Andam nang itunol sa Department of Public Works and Highways (DPWH) ngadto sa lokal nga kagamhanan ang 2,160 ka post sa suga nga mibalor og P90 milyones inigkahuman sa ilang final inspection niini.

Matud sa tigpamaba sa DPWH Marie Nillama nga napasiga gyud ang tanan atol sa ASEAN Summit diha sa mga modernong poste niini nga gilaray sa "ceremonial routes" nga ang tadlas diha sa Cebu City, Mandaue City ug Lapu-Lapu City.

Gibutyag ni Nillama nga duha ka klase ang maong mga poste sa suga diin ang 300 niini non-decorative nga mikantidad og P83,000 ang matag usa, ug 1,860 ang mga decorative nga nagkantidad og P95,000 ang usa.

Ug unya na nila bayri sa katunga o sa P45 milyones ang kontraktor niini inighuman nila'g inspection karong sunod semana.

Human sa pahigayong inspection itunol usab dayon sa DPWH ang maong mga street lights ngadto sa kagamhanan sa Cebu City, Mandaue City ug Lapu-Lapu City, kutob sa mga poste nga nahisakop sa hurisdiksyon.

Si Nillama midugang nga samtang wala pa ika-turn over ang maong mga poste ang DPWH maoy nagbayad sa electric bills ning mga sugaa.