Tomas wa nay interes sa DOT

Nawad-an na og interes si Mayor Tomas Osmeña sa tinguha ni Presidente Gloria Arroyo nga ibalhin dinhi sa Sugbo partikular na diha sa South Reclamation Project (SRP) ang ulohang buhatan sa Department of Tourism (DOT).

Atol sa press conference kagahapon sa udto gibutyag sa mayor nga napul-an na siya sa pagpinaabot sa pagbalhin sa buhatan sa DOT diha sa SRP apan hangtod karon wala pa kini matuman.

Gibasol hinuon ni Osmeña si DOT Secretary Joseph Ace Durano nga usa ka Sugboanon apan wala gyud mohimo og lakang aron matuman ang pagbalhin sa maong ahensya dinhi sa Sugbo nga dugay nang gi-aprobahan sa Presidente.

Gipadayag sa mayor nga gipul-an na sila og paabot niini hinungdan nga paaboton na lang nila kun mahinayon na ba gyud ang maong plano apan iyang gipadayag nga dili na siya mohimo og lakang aron lang matigayon ang maong plano.

Gibutyag ni Osmeña nga andam na ang tanan ilabi na ang lugar diha dapit sa Kawit Island nga maoy tukoran sa buhatan unta sa maong ahensya ingon man ang plano sa pagatukorong edipisyo ug labaw sa tanan duna nay negosyante nga mipasalig nga maoy mogasto pagpatukod sa buhatan sa DOT ug igo na lang untang moabang ang gobyerno niini.

Kining maong programa tipik ug kabahin sa programa ni Presidente Gloria Arroyo nga pag-decongest niadtong mga naglunlon lang nga mga buhatan sa gobyerno didto sa kaulohan ngadto sa lain-laing mga dapit dinhi sa nasud.

Naobserbahan usab nga dili kaayo suportado ang pagbalhin sa buhatan sa DOT dinhi sa Sugbo sa mga dagkong opisyal sa turismo didto sa kaulohan.