Calderon mapasalamaton sa mga taga Cebu paglampus sa summit

Dako kaayo ang pagpasalamat sa kapolisan tungod sa malampusong pagpahigayon sa Asean Summit dinhi sa Sugbo tungod sa gihulagway nilang kooperasyon sa mga Sugboanon.

Ang mga kadagkoan sa PNP pinanguluhan ni PNP Director Oscar Calderon atol sa pagpakighinabi sa mga tigbalita kagahapon nagkanayon nga ang kultura ug pamatasan sa Sugboanon pag-abot sa seguridad ang hisgutan sahi ra kaayo sa ubang rehiyon.

Atol sa maong kalihukan dunay tulo ka mga task forces nga milihok sa seguridad, kini ang TF Alalay sa AFP, TF Lapulapu sa Presidential Security Group ug ang TF-Cebu sa PNP.

Samtang si Police Director Antonio Billones, ang over-all security task force commander, nagkanayon nga ang deployment sa tanang pwersa, pagtabang sa nagkadaiyang ahensya sa gobiyerno paghatag sa mga kinahanglanong ekipo, sakyanan ug kahimanan ingon man ang kooperasyon sa mga tawo maoy nakaingon sa maong kalampusan.

Si Police Regional Office 7 director ug maoy TF-Cebu commander, Chief Supt. Silverio Alarcio, Jr. mapasalamaton usab sa mga pribadong sektor nga mipahulam sa ilang mga tow trucks ug ubang mga wala na magpailang mitabang sa seguridad.

Wala usab mabalaka si Alarcio sa mga bahad nga sila ikiha sa mga militante sanglit asoy pa sa opisyal ila ra gihimo ang ilang trabaho ug dako ang iyang pagtuong dili gyud buot sa mga militante nga molampos ang summit ug plano lang nilang samukon ang kalihukan ug pakauwawan ang gobiyerno sa mga langyaw'ng bisita.

"Nagtatrabaho lang kami, kung magkakaroon kami ng kaso ay OK lang yan..sana kung may reconciliation (panag-uliay) ay hindi para lang sa summit, sana tuloy-tuloy na lang natin," asoy pang Alarcio.

Samtang mapasalamaton si Alarcio nga wala kaayo'y mga Sugboanon nga mikuyog sa maong mga rally sanglit sagad sa misamok-samok dili taga dinhi ug naggikan sa ubang rehiyon.

Kagahapon sa hapon gitapos sa security forces ang ilang kalihukan pinaagi sa 'bodol fight' diha sa atubangang bahin sa CICC diin tanang mga opisyal ug mga yanong polis nagsalo og kaon.