Ang gipusil ug namatay mao si Eduardo Peteros, lumad nga taga Calunaga, Merida, Leyte kinsa nakaangkon og usa ka pinusilan sa ulo samtang ang nipusil mao ang iyang kapuyong si Leonora Pajuay 47, biyuda, lumad nga taga Malabuyoc, Cebu. Ang duha kasamtangang nagpuyo sa maong dapit.
Sa pasiunang imbestigasyon sa kapolisan pinaagi ni SPO1 Romel Parcon nasayran nga sa wala pa mahitabo ang pagpamusil giingon nga nag-kaaway, nianang gabhiona ang duha.
Giingong ang suspek gikulata sa biktima atol sa ilang panaglalis ug nakaangkon usab og grabeng bun-og sa nagkadaiyang bahin sa kalawasan.
Ang biktima paingon na untang matulog apan ang suspek mikuha sa armas nga .38 nga paltik ug gipusil kausa ka higayon tumong ngadto sa ulo sa biktima.
Ang mga miresponding kapolisan didto sa crime scene daling midala sa biktima sa Minglanilla District Hospital apan patay na kining nadangat human gideklarar sa mga doktor sa maong tambalanan.
Na-recover sa kapolisan ang armas nga maoy gigamit sa pagpusil ug upat ka buhing bala ug usa ka empty shell.
Hinuon ang suspek misurender sa kapolisan human sa insidente.
Si SPO1 Romeo Barde nga nahinabi sa Banat News miingon nga si Pajuay mitug-an kanila nga dunay gamay'ng panaglayog tali sa biktima dihang kini ubos sa impluwensya sa ilimnong makahubog.
Matud ni Barde nga gipakitaan sila ni Pajuay sa iyang mga bun-og sa walang bukton human gikulata sa biktima apan dili pa matino sa kapolisan kun ang maong bun-og resulta sa ilang panaglalis.
Dugang pang Barde nga kanunay kining mag-away ug mangulata ang biktima ilabi na kun mahubog. Hinuon nagpadayon pa gihapon ang imbestigasyon sa kapolisan pagsuta sa tinuoray nga motibo sa pagpusil sa suspek ngadto sa biktima.