Duha ka polis sa Singapore nasikop sa Lapu

Duha ka Singaporean nationals gisikop sa kapolisan sa dakbayan sa Lapu-Lapu human kini nagdala ug armas nga naglaag-laag sa Pusok, Lapu-Lapu sa milabay'ng hapon.

Ang gisikop mao si Saifudin Bin Abu, 30, minyo ug Kook Yew Wai Titus, 28, pulos mga sakop sa kapolisan sa Singapore diin lakip sa security personnel sa ilang mga delegado sa Asean summit.

Matud pa ni PO2 Dante Villacarlos ug PO1 Ivonne Berja nga nadestino sa maong dapit nga ilang nakita nga nagsuroysuroy ang duha ka Singaporean kay nangita kini og pagkaon ug buot nga mosuway sa pagkaon kilid nga bahin sa dalan padulong sa Lapu-Lapu City Hall.

Namatikdan ni Villacarlos nga dunay nagbagal sa hawak sa duha hinungdan nga ila kining gisikop ug gidala sa headquarters sa kapolisan sa dakbayan sa Lapu-Lapu nga may armas nga .9mm pistol.

Atol sa imbestigasyon nasayran nga mga sakop diay sa Singaporean Police force ang duha ug lakip kini sa mga security detail sa ilang mga delegado sa Singapore.

Matud pa ni Supt. Loiue Oppus, hepe sa kapolisan sa Lapu-Lapu nga human kini makapakita og dokumento sa ilang legal nga paghupot og armas ug ang clearance gikan sa FEASSAGS sa kampo Crame iya ra usab kining gibuhian ug gihatod sa ilang kasamtangang gipuy-an sa dakbayan sa Lapu-Lapu.

Matud pa ni Oppus nga sukad sa paghiabot sa mga delegado ug sa mga heads of states walay mga dagkong hitabo nga naglambigit sa gihimong 12th Asean Summit sa iyang area of jurisdiction gumikan usab sa ilang pag-alerto 24 oras uban sa iyang mga sakop.