Gipasabot sa mga guwardya nga gitugyanan sa pagbantay sa seguridad sa simbahan nga mas labing maayo kun kadtong mga debotos ni Señor Santo Niño mosayo-sayo sa ilang pagduaw sa Basilica aron pagyukbo sa Balaang Bata.
Gibutyag sa mga sakop sa Parish Security Group nga mopatuman sila og mga estrikto nga security procedures diha sa Basilica pinaagi sa pag-designate og mga entrance ug exit nga adto lang mahimong moagi ug mogawas ang mga manimbahay.
Nabantayan usab nga gipadugangan ang gidaghanon sa mga guwardya nga nagbantay sa mga ganghaan paingon sa simbahan ug mas gipahigpitan pa nila ang paghiling sa mga bag ingon man pagrekisa sa mga tawo nga mosulod.
Kini aron maseguro nga walay mga tawo nga makahigayon pagdala ug mga eksplosibo ug mga hinagiban sulod sa simbahan.
Pagkakaron, dili pa kaayo daghan ang mga tawo nga manulod sa Basilica aron modagkot og kandila ug moyukbo sa imahen sa Señor Santo Niño.
Gibalhin na hinuon gawas sa simbahan ang dagkotanan og mga kandila aron nga dili maghuot ang mga tawo sa sulod sa simbahan ug ingon man dili magpuot ang aso sa mga gidagkotan nga kandila.