Daghan pang wa karehistro - Sinulog F.

Gihatagan og higayon sa Sinulog Foundation ang mga out-of-town contingent nga hangtud karon wala pa makaparehistro aron makasalmot gyud kini sa Sinulog Grand Parade karong adlaw'ng Domingo, petsa 21 niining bulana.

Kini human gipahibalo ni Ricky Ballesteros, executive director sa Sinulog Foundation nga gilugwayan nila og unom ka adlaw ang pagpanawat sa dugang pang mga contingent nga moapil sa Sinulog Mardigras.

Nasayran nga niadto ra untang nilabay'ng Biyernes ang deadline sa registration sa mga contingent apan tungod kay gamay pa lang ang mga nakaparehistro, nakahukom ang Sinulog Foundation nga lugwayan ang deadline og unom ka adlaw hangtud sa petsa 18 karong semanaha, adlaw'ng Huwebes.

Base sa labing uwahing pakisusi sa Banat News nasuta nga duna pa lay unom ka mga contingent ang nakaparehistro alang sa Sinulog base og laing unom ka contingent sa Free Interpretation category.

Apan gipadayag ni Ballesteros nga ang numero unong hinungdan nga ilang gihatagan og lugway ang deadline tungod kay nakadawat sila og filler nga duna pay mga out of town contingent nga napakyas pagkab-ot sa deadline ang gustong moapil sa Sinulog Mardigras.

Gipaabot ni Ballesteros nga karong semanaha magpusot- pusot na og pa-rehistro sa buhatan sa Sinulog Foundation ang dugang mga out-of-town contingent.

Gani masaligon siya nga mas modaghan pa ang mga contingent sa Sinulog karong tuiga itandi sa nilabay'ng tuig nga niabot lang og 40 ka contingent ang tanan tungod sa daghang mga tawag nga iyang nadawat gikan sa mga contingent sa lainlaing lugar nga nag-konpirmar sa ilang pagsalmot.

Hinuon, automatic sab nga makasalmot sa Sinulog karong Domingo ang mga nigawas nga mananaug sa gipahigayong Sinulog sa Kabataan sa dakbayan ug lalawigan niadtong Sabado og Domingo.