Anak nga 'nagmaoy' giluba sa iyang papa

Nalandig sa tambalanan ang usa ka 21-anyos nga lalaki kinsa gikatahong nagmaoy human kini unaya pagdunggab sa iyang amahan niadtong Sabado sa kaadlawon diha sa Sitio Laray, Barangay San Roque dakbayan sa Talisay.

Nakaangkon og samad dinunggaban sa kilid dapit sa gusok si Junrel Quimada, residente sa maong lugar ug dali kining gidala diha sa Talisay District Hospital apan tungod sa kahimtang niini gibalhin diha sa Vicente Sotto Memorial Medical Center niining dakbayan.

Ang suspetsado mao si Teodorico, 42, residente usab sa lugar, amahan sa biktima nga daling miikyas human sa hitabo.

Base sa pasiunang imbestigasyon ni PO2 Joel Rosales, polis sa Talisay, nga hubog si Junrel og gibadlong kini ni Teodorico tungod kay nangita kini og gubot.

Nahimong lalis sa duha ang pagbadlong ni Teodorico sa iyang anak nga nagmaoy og sa kalagot ni Teodorico nadunggaban niini si Junrel.

Ang kapolisan sa siyudad mipahigayon og follow-up sa maong insidente.