2 ka Ingram nasakmit sa PUJ gikan sa Danao

Duha ka high-powered nga armas nasakmit sa kapolisan human sa gipahigayong checkpoint nga Oplan Sita sa kapolisan sa miaging gabii diha sa National Highway sa Estaca, Compostela.

Si Insp. Ramon Lacno uban sa mga sakop, mipahigayon og checkpoint sa maong lugar aron pagsigurong walay mga dautang tawo gikan sa gawas nga makasulod sa Metro Cebu diin gipahigayon ang summit.

Usa ka PUJ multicab nga nagbiyahean sa Danao paingon sa North Bus Terminal puno sa mga pasahero maoy gikatahong gikargahan sa duha ka 9mm Ingram submachine pistol ug upat ka magazine nga walay bala ug duha ka improvised nga silencer niini ilawom sa lingkoranan.

Si PO2 Antonio Aguisanda nga nahinabi sa Banat News nagkanayon nga ang maong PUJ dunay tulo ka mga lalaki nga sakay ug kasagaran niini mga babaye nga trabahante sa Mitsumi.

Nagtuo si PO2 Aguisanda nga ang maong armas dad-on sa laing lugar ug posibling gamiton karong umaabot eleksyon.

Matud ni Aguisanda wala mangangkon ang tulo ka mga pasahero nga lalaki sa dihang gipangutana sa mga polis.

Si Chief Supt. Antonio Billones, over-all task force commander for security sa summit mitug-an sa pakighinabi sa mga tigbalita nga walay kalambigitan sa summit ang maong mga armas.

Matud pa sa opisyal nga duha ang katuyoan sa mga checkpoint, kini mao ang pagbantay sa mga dautang elementong posibleng mosamok sa summit ug ingon man ang pagpatuman na sa gunban sa Comelec nga kagahapon nagsugod.