PNP mihimo og security inspection

Subling mipahigayon og security inspections ang kadagkoan sa kapolisan sa tanang mga dapit dinhi sa Metro Cebu aron pagtino sa kahigpit sa seguridad samtang gipahigayon pa ang Asean Summit nga gikatakdang matapos karong adlawa.

Ang mga opisyales sa kapolisan nga mihimo sa inspections mao sila si Chief Supt. Antonio Billones, ang over-all security task force commander sa summit, Chief Supt. Silverio Alarcio, Jr. TF-Cebu commander, Chief Supt. Samuel Pagdilao, ang tigpamaba sa PNP; Chief Supt. Luisito Palmera, Chief Supt. Jaime Milla ug uban pang dagkong opisyal sa PNP gikan sa kaulohan.

Unang gibisita sa mga opisyal ang Ayala Mall diin giobserbahan nila ang pagpaniksik sa mga gamit ug pagrekisa sa mga kustomer nga manulod sa maong mall, gisusi usab ang mga K9 units sa Special Action Force nga misiksik sa mga sakyanan ug mga bagahe.

Matud pang Billones sa mga tigbalita, kabahin kini sa ilang pagsigurong luwas ang Sugbo dili lang sa mga bisita sa Asean Summit kundili hangtud na sa kinatibuk-an.

Niadtong tungora dunay delegasyon nga kauban sa asawa sa lider sa Cambodia ang miadto sa maong mall aron pagpamalit.

"Successful, we hope in terms of security na walang mangyayari hanggang matapos ang summit," asoy pang Billones.

Atol ning pagsulat sa balita, ang grupo miadto na sa SM department store ug isunod ang simbahan sa Sto. Niño ingon man mga dapit diin baga ang duot sa mga tawo.