Mga lider ug sakop sa militante gikasuhan kagahapon

Duha ka mga lider sa militanteng grupo uban sa ilang mga sakop nga nadakpan atol sa ilang gipasiugdahang protest rally atol sa pagbukas sa 12th Asean Summit sa dakbayan sa Mandaue ang hingpit na nga gipasakaan og kaso sa kapolisan kagahapon.

Ang gipasakaan og kaso mao sila si Lito Vasquez, Laban ng Masa spokesperson ug kanhi University of the Philippines President Dr. Francisco Nemenso.

Ang nalakip sa gipasakaan og kaso nga nadakpan mao sila si Edwin Roasa, 29 anyos, taga dakbayan sa Talisay nga maoy chairman sa Bukluran ng Manggagawang Pilipino ug Regional Staff sa Partido ng Manggagawang Pilipino Partylist ug Allan Pisquera, 29 anyos, taga Pajo, dakbayan sa Lapu-Lapu ug staff sa partidong Manggagawang Pilipino.

Si Senior Superintendent Alexander Abadinas, director sa kapolisan sa Mandaue City Police Office, (MCPO) Senior Superintendent Mariano Natuel, task force commander sa Crowd Dispersal and Management Unit ug mga kauban niining opisyal maoy nagpasaka sa kaso.

Ang kasong illegal assembly, resisting arrest to person on authority ug traffic distruction maoy mga kasong gisang-at sa kapolisan batok sa maong mga lider sa militanteng pundok.

Si Vasquez ug Nemenso wala malakip sa pagsikop atol sa nahitabong lamok-lamok dihang namugos sa pagpaduol ang mga raliyista sa CICC.

Gipanghimakak hinuon ni Vasquez nga tuyo nila ang pagpaduol sa CICC sanglit sa ilang nahimutangan nga duol sa San Miguel Corporation igo lamang silang nagsayaw og Sinulog.

Matud pa niya nga ang ilang gihimo mao ang pag-abog lamang sa inahan sa mga kalamidad nga maoy iyang gipasabot si Pangulong Gloria Macapagal Arroyo.