Sir Dodong gipasidunggan atol sa Talisay charter day

Bisan pa sa uwan malampuson nga gipahigayon ang testimonial dinner sa ika-6th nga pagsaulog sa Charter day sa Talisay niadtong Biyernes sa gabii diha atubangan sa City Hall sa siyudad.

Ang kagamhanan sa Talisay mihatag og pasidungog ngadto sa mga tawo kinsa naghatag og dungog sa dakbayan.

Ang gipasidunggan mao ang Team Talisay Volleyball Women ug ang team manager niini nga si Edgardo Mabunay, Talisay City Choir nga gitukod dihang si Kongresista Edgardo Gullas mao pay mayor sa siyudad ug si kanhi Kongresista Jose "Dodong" Gullas tungod sa pagpasar niini og House Bill nga nakapa-regionalized sa mga sweldohan sa mga magtutudlo ug sa mga nahatag niining kaayohan sa dakbayan dihang siya pa maoy Kongresista sa unang distrito.

Ang kanhi Kongresista mapasalamaton kaayo tungod sa nadawat niyang pasidungog.

Ang pagsaulog sa pagkahimong dakbayan sa Talisay atol sa adlaw'ng natawhan ni kanhi Vicente Gullas nga amahan sa Kongresista ug kanhi Kongresista.

Sa laing bahin, si Kongresista Eddie Gullas sa iyang mensahe nanghinaot nga padayonon sa mga Talisaynon ug sa mga opisyal niini ang panaghiusa para mahimo pa gyung malambuon ang dakbayan.

Ang maong mensahe dili lang para sa karon nga henerasyon lakip na sa mga mosunod pa.