Tomas mipatunga sa rally

Nawagtang ang tensyon tali sa dul-an sa usa ka libong mga militanteng raliyista ug tulo ka platoon nga Crowd Dispersal Management unit sa kapolisan human mipatunga si Mayor Tomas Osmeña alang sa negosasyon kagahapon sa buntag.

Si Osmeña kinsa dayag kaayong mitugot sa mga militanteng pundok nga miingon nga bukas ang Sugbo sa mga lihok protesta mao pay mipasabot sa mga raliyista kagahapon nga di na mahimong mopaduol pa sila sa ceremonial route.

Ang pundok sa Bagong Alyansang Makabayan, Bayan, Bayan Central Visayas, Bayan Muna, League of Filipino Students ug ubang sub-groups nga mitawag sa ilang hiniusang pundok nga Voyagers for Peace naggikan sa nagkadaiyang lugar ug rehiyon sa nasud aron pagpadayag sa ilang pagsupak sa ilang gihulagway nga pag-apil-apil sa Estados Unidos sa Asean summit ug uban pang pagsaway sa gobiyerno.

Ang mga militante diha temporaryong gipapuyo ni Osmeña sa Zapatera Elementary School samtang nagpadayon pa ang summit.

Ang mga lider sa mga raliyista nga sila si Arman Perez, Renato Reyes, Rev. Rey Gelloagan, Judy Aguilar sa Health Alliance for Democracy, Paul Rodriguez, Glemar Bacusmo ug Jaime Paglinawan misuway unta sa paghangyo kang Osmeña nga palahuson bisan diha sa atubangan sa simbahan sa Mabolo.

Apan si Osmeña bisan sa ulan miatubang kanila ug mipasabot nga di gyud mahimo ang ilang gihangyo. Subling gipasabot ni Osmeña nga ang tibuok Sugbo mao ang freedom park sa mga militante apan walay labot ang ceremonial routes.

Matud pa sa mayor nga personal niyang gikuyugan ang mga raliyista aron dili mosangpot susama sa nahitabo sa Mandaue diin namugos ang mga militante nga miresulta hinuon sa kagubot.

"I'm responsible, because what is important here is, something like this is difficult to control... I don't like to do it if I am somewhere else, comparing Manila to Cebu malayo even Mandaue," pasiaw pa sa mayor sa mga tigbalita.

Samtang si Sr.Supt.Mariano Natuel, ang task group commander sa CDM nagkanayon nga di gyud niya tugutang makapaduol bisan sa ceremonial route ang mga raliyista ug mapasalamaton sa presensya ni Osmeña.

"I can guarantee nga di sila makalahos sa CICC but what I can't guarantee nga walay mahitabong komosyon," asoy pa niini sa Banat News.

Human masunog ang effigy ni Presidente Gloria Arroyo ug US president George Bush namauli ra usab ang mga militante nga basa na kaayo sa ulan.