6 ka Akhro 'sakmitan rebolber

Unom ka giingong sakop sa Alpha Kappa Rho nasikop sa kapolisan sa Talisay kinsa duha niini nasakmitan og .38 kalibreng rebolber nga dunay tulo ka buhing bala matag usa niadtong Huwebes sa gabii diha sa Bulacao, Talisay.

Ang mga nasikop giila nga si Jomer Pananganan, 20, Ralph Stephen Mañacao, 19, Roy Pardoncillo, 22, Arnel Austria, 24, Raul Labiaga, 20, ug Mayco Alcover, 19, pulos mga residente sa nahisgutang siyudad.

Si Pananganan ug Mañacao nasakmitan sa mga polis og rebolber nga dunay mga bala.

Ang unom kinsa gikompirmar sa kapolisan sa siyudad nga mga sakop sa Akrho tungod sa marka sa tuong kamot niini kilid sa pulso nadetiner karon diha sa Talisay police detention cell.

Si SPO3 Romeo Hurboda, PO2 Julius Caesar Parajes ug PO1 Cyrus Pito misikop sa mga suspetsado samtang nagsuroy-suroy sa lugar diin sila mangasikop.

Ang mga barangay tanod sa lugar nga si Nestor Bacalso Jr., Joebert Alipar, Proseso Lapas ug Patrocinio Apas ang miayuda sa mga polis pagsikop sa unom ka suspetsado.

Si Supt. Romeo Perigo, hepe sa kapolisan sa siyudad nagkanayon sa pakighinabi niini sa Banat News kagahapon nga ang maong grupo posibleng mobawos sa nagpusil sa ilang kauban niadtong Miyerkules sa gabii diin usa ang namatay ug usa ang naangol.

Matud ni Perigo nga si Pananganan ug Mañacao pasakaan nila og kasong illegal possession of firearms karong Lunes ug ipaubos nila sa imbestigasyon sila si Pardoncillo, Austria, Labiaga ug Alcover.