Kadudahang tawo ang gipatay

Usa ka lalaki nga gikan sa Bohol ang misteryosong gipatay sa duha ka wala mailhing mga tawo diha sa dalan Tormis sa barangay Sambag Uno. Usa sa nakapaduda sa kapolisan mao ang lisensya niini sa armas nga permit to carry firearms ug daghang kwarta sa iyang pitaka ug bulsa.

Ang maong lalaking gipatay base sa nakuhang ID kaniya giilang si Harry Atega, 23, taga dalan Pedro Cui sa Sta. Ana, Manila apan lumad nga taga San Miguel, Bohol.

Ang mipusil sa biktima yano ra usab nga milakaw palayo sa gikahitaboan subay sa dalan Spongclong sa naasoy'ng barangay.

Matud pang SPO3 Zenaido Pastorfide, imbestigador sa Homicide Section, walay nakailang residente sa maong lugar sa biktima.

Ang biktima gidul-itan og pusil diha sa tuong kilid ug sa tuong bahin sa iyang ulo duol sa iyang dunggan ug patay kini diha-diha sa tunga-tungang bahin sa kalsada.

Usa sa nakapaduda kanila mao ang nakuhang lisensyang permit to carry firearms outside of residence ug lisensya sa armas nga 9-millimeter caliber pistol ug kwartang P9,500 diha sa pitaka niini.

Sa pagsusi sa kapolisan sa patay'ng lawas niini dunay nakuhang P23,355 nga cash diha sa mga bulsa niini, sunglasses, mahalong relo, yawe sa motorsiklong Rusi, driver's license ug uban pang personal nga dokumento.

Wala hinuoy nakuhang armas ug cellphone gikan sa biktima apan gituohang gikuha kini sa mga mamumuno.

Sumala pang Pastorfide, walay trabaho ang biktima base usab sa gitug-an sa amahan niini nga miabot gikan sa Bohol kagahapon.

Si Rodulfo Atega, amahan sa biktima, sa pakighinabi sa Banat News nagkanayon nga niadtong Lunes ulahi niyang nakit-ang buhi ang anak diha sa Bohol ug mipahibalo kining moanhi dinhi sa Sugbo.

Matud pang Atega nga kaniadto nagtrabaho sa Manila ang iyang anak sa usa ka tindahan og electronic parts ug duna kini mga higalang sundalo didto apan ning bag-uhay natangtang na kini sa trabaho.