Ang gikonbikto mao si Eugenio Aratea, 77, usa ka US immigrant gikan sa San Francisco, California, USA.
Base sa upat ka pahinang hukom ni Judge Veloso, si Aratea gikonbikto sa kasong kalapasan sa Akta Republika 8294 gumikan sa iyang pagdala sa usa ka kalibre .38 Smith and Wesson gikan sa Estados Unidos nga walay igong dokumento nga nagpakita nga kini usa ka lisensiyadong mogamit sa armas.
Gumikan niini, si Aratea nahukman nga mabilanggo sulod sa upat ka tuig, siyam ka bulan ug 11 ka adlaw sa prision correctional sa minimum hangtod sa lima ka tuig, upat ka bulan ug 20 ka adlaw nga may maximun nga multa nga P15 mil, samtang ang armas konpiskahon pabor sa gobyerno.
Kahinumduman nga si Aratea nasikop niadtong Nobiyembre 17, 2004 mga 8:55 sa buntag sa mga sakop sa Enforcement Security Services (ESS) sa Bureau of Customs - Port of Mactan pinaagi ni Marlo Malabrico sa Scanning Unit nga nadestino sa Mactan Cebu International Airport.
Si Aratea nga gikan sa San Francisco, California misakay sa Philippine Airlines padulong sa Manila ug connecting flight dinhi sa Sugbo dala ang maong kalibre .38 sa iyang bagahe.
Matud pa ni Malabrico nga iyang nakita sa X-ray machine nga dunay armas ang bagahe ni Aratea hinungdan nga gihimoan kini og 100% nga inspeksiyon ug nakuha ang maong armas nga giapil ug lukot sa pedal sa bisikleta.
Bisan pa sa pagpasabot ni Aratea nga igo lamang kini niyang himuong souvenir ang kalibre .38 apan gipasaka gyud sa mga sakop sa ESS ang maong kaso ug hinungdan sa pagkakonbikto ni Aratea.