Cebu himuo'g 12 ka distrito

Imbes buak-buakon ang Cebu ngadto sa upat ka probinsiya, mas maayo pang himoon kining 12 ka distrito ug mao kini usa sa umolong balaod ni kanhi Gobernador Pablo Garcia kon ituboy siya sa pagkakongresista sa mga katawhan sa ikaduhang distrito sa Sugbo.

Si Garcia kinsa nagpanikad nga mahibalik sa kongreso aron tition ug ihalad sa taga Cebu ang iyang mga kasinatian, abilidad ug kahibawo sa pamalaod samtang may kinabuhi pa siya, nagkanayon nga makigtagbo siya sa mga mayores sa maong distrito sa liwas sa Asean summit.

Dako'g pagtuo si Garcia nga malukmay niya ang mga hunahuna sa mga mayores kinsa sa sayo pa nagpakitag pagsupak sa iyang laraw nga pagkandidato alang sa kongreso sa umaabot nga election.

Miingon si Garcia nga kon itugot sa katawhan sa ikaduhang distrito ang una niyang himoong balaod mao ang pagpahigayon og espesyal nga election alang sa mahimong dugang unom ka mga kongresista sa dugang unom ka distrito.

Ang populasyon sa Cebu misaka na ngadto sa kapin sa tulo ka milyon og tungod kay tag 250,000 man ang populasyon alang sa usa ka distrito, mosakar na kini alang sa pagdugang og unom ka bag-ong distrito pinaagi sa pagpaminus na lang sa mga lungsod nga molangkob sa matag distrito.