Gibutyag ni Canillas nga si Ronaldo Puno, kalihim sa Interior and Local Government miluwat og kamanduan kabahin sa pagsusi sa mga establisamento nationwide pagsiguro kung ang tanang tag-iya og mga establisamento nagtuman ba sa fire safety regulations and standards.
Tumong sa kalihim nga wala nay laing mahitabong insidente sama sa nahitabong trahedya sa Unitop General Merchandise sa Ormoc niadtong pasko diin sobra sa 20 ka tawo ang namatay.
Ang kabomberohan sa Talisay mipahigayon og inspection sa tanang establisamento sa dakbayan sukad niadtong Disyembre 31, 2006 pagtuman sa kamanduan ni Puno.
Si Canillas nagkanayon nga aduna silay nasutang mga minor nga kalapasan diin adunay mga establisamento sa siyudad ang walay mga emergency lights ug luminous signage sa mga exit nga agianan.
Ang maong mga establisamento gipadalhan na og mga notice sa Bureau of Fire sa Talisay kabahin sa ilang kalapasan og gihatagan kini og 15 ka adlaw ngadto sa duha ka buwan para pagtuman sa mga rekomendasyon.
Ang Bureau of Fire mohatag og tulo ka notisya ngadto sa mga estblisamento nga wala makatuman sa paagi aron kalikayan ang sunog.
Sulod sa tulo ka notisya kung dili pa gyud motuman ang maong mga establisamento ipadala ngadto sa provincial office ang mga ngalan niini para sa sunod nga action.
Si Canillas midugang nga irekomendar nila sa local government unit ang pagpasirado sa mga establisamento kung padayon kining magpagahi-gahi.