Pampublikong timbangan sa mga merkado ibutang vs mga tikasan

Butangan na og mga pampublikong timbangan ang tanang mga kamerkadohan ug mga satellite market dinhi sa dakbayan sa Sugbo sugod sa pipila ka mga adlaw.

Ang Cebu City Hall mopatuman niining maong palisiya aron pagpanalipod sa interes sa mga kunsumidor batok niadtong mga mapahimuslanong negosyante nga mogamit og mga tikasang timbangan aron makaganansya og dako sa ilang mga gipamaligyang produkto.

Matud ni Raquel Arce, acting market administrator, pagkakaron nagpaabot na lang sila nga ma-deliver ang napulo ka mga public weighing scale nga ilang gipalit alang niining maong katuyo-an.

Ang napulo ka mga timbangan nga gipalit sa City Hall bahinon kini diin ang lima niini anha ipamutang sa mga kamerkadohan sa Carbon ug ang laing lima sa mga gagmay'ng merkado sa kabarangayan.

Usa ka public weighing scale ang ibutang unya diha sa may Unit I, II ug Unit III, ug laing tagsa ka timbangan diha sa Freedom park ug Warwick barracks.

Samtang ang laing lima ibutang diha sa mga satellite market sa Pardo, Taboan, Pasil, T. Padilla ug Ramos public market.

Kadtong mga mangomprahay makasiguro na unya nga insakto ang timbang sa ilang mga pamalitong produkto sa mga manindahay niining maong mga merkado tungod kay ang matag produkto nga ilang mapalit diha sa matag vendors mahimo man nila kining matandi ngadto sa public weighing scale nga i-plastada sa maong lugar aron pagtino kun insakto ba ang timbang sa mga napalit niining produkto.

Matud ni Arce ang maong lakang gipasubay sa Consumers welfare act diin gipanalipdan ang mga konsumidor batok niadtong mga abusadong negosyante.