Kini ang giluwatang pamahayag ni SPO2 Rolito Jumao-as, imbestigador sa homicide section sa kapolisan sa dakbayan sa Lapu-Lapu.
Gihulagway ni Jumao-as nga usa ka lalaki ang maong patay'ng lawas ug gidudahang sakop sa militar ang biktima gumikan sa mga senyales niini sama sa nakita nga bulawang singsing nga dunay kulit sa usa ka angkla sa barko, military cut ang buhok, nagsul-ob og t-shirt gray nga dunay markang Asian Aerospace, nagmaong pants nga blue, panit nga bakos, gibanabana nga 30 ngadto sa 40 anyos ug 5'6 ang gitas-on.
Matud pa ni SPO2 Jumao-as mga alas 11:00 kagahapon sa buntag samtang nagpahigayon ug security patrol ang mga sakop sa PNP Maritime sa palibot sa Mactan channel gamit ang ilang rubber boats, usa ka tao ang ilang nakit-ang patay nga naglutaw ubos sa 2nd Bridge hinungdan nga ila kining gidala sa daplin sa baybayon sa Pusok.
Sa pagsuwat ning balita wa pa masayri kung kinsa ang maong biktima ug nagpaabot na lang sila sa resulta sa autopsy sa patay'ng lawas niini gumikan kay ang dagway niini naguba na ug posibleng gidakdakan sa bato sa wa pa kini ilabay sa dagat.
Ang patay'ng lawas gidudahan nga sa milabay'ng gabii pa kini naglutawlutaw sa kadagatan.