Dubok ug baho nga isda ang gisabwag diha sa Malacañang

Mga baho ug dubok nga isda ang gipangsabwag sa militanteng mangingisda diha sa atubangan sa Malacañang Sugbo kagahapon agi'g pagprotesta sa kalihukan sa summit nga ilang gihulagway'ng makaapekto sa mga gagmay'ng mananagat.

Hinuon, ang mikuyog sa protesta kagahapon gihulagway sa kapolisan nga diyutay ra ug wala usab sila abuga sa kapolisan ug mga bantay sa palasyo sa pangulo.

Ang maong kalihukan gikatahong kabahin sa 'Protestang Dagat' Cebu 2007 agi'g sa pagpadayag og pagsupak sa Kilusang Mangingisda pinanguluhan ni Izza Gonzalez.

Ang KM milusad og anti-Asean ug World Trade Organization fisheries trade liberalization tungod sa pagtuong ang makab-ot nga kasabutan sa lider sa nasud nga mawad-an usab og trabaho ang mga gagmay'ng mananagat ingon man madaut og samot ang kadagatan.

Mipasangil ang maong pundok nga kung mapalig-on sa Asean countries ang ilang kasabutan nga diin gituuhan sa mga gagmay'ng mananagat nga mga dagkong kumpanyang panagatan ray gitarget nga makabenepisyo, magutman ang mga pobreng mangingisda.

"With the fisheries as the last frontier for food and livelihood security for the majority of the poor in the region, there is an urgent need to defend it from encroachment of big business who has no respect for the life of the seas nor of the fishers," asoy pang Gonzalez.

Ang kalihukan sa KM langkuban sa grupo sa Youth for Nationalism and Democracy (YND) ug Sanlakas-Youth.

Gikatakda usab nga mopahigayon og fluvial protest ang mga gagmay'ng mangingisda nga salmutan sa 100 ka mga bangkang panagatan karong adlawa diha sa Mactan channel.