2 patay, 1 grabe sa panagbangga

Duha ang patay samtang usa ang kritikal sa ospital sa panagbangga sa duha ka PUJ ug usa ka 10-wheeler truck didto sa Yati, Liloan sa milabay'ng gabii.

Ang mga nangamatay mao sila si Antonio Embodo, lumad sa lungsod sa Compostela ug Juvito Olivar, nagpuyo sa Tuburan Sur, Danao. Ang naangol mao si Elen Togado, 25, lumad sa Talamban, dakbayan sa Sugbo. Silang tulo mga pasahero sa usa ka minibus nga nagbiyahian og Danao ug siyudad sa Sugbo nga gimaneho ni Ronilo Hermosilla, taga Danao.

Sa imbestigasyon ni PO1 Erwin Balverde sa Liloan Police Station nasuta nga padulong si Hermosilla sa Danao mga alas 9:30 sa milabay'ng gabii. Si Joel Pulgas nga nagmaneho sa PUJ nga walay pasahero padulong sa Mandaue kalit lang gidasmagan sa usa ka 10-wheeler truck nga gimaneho ni Rico Dionola, lumad nga taga Zamboanga City ug drayber sa Blue Sky Trucking.

Matud pa ni Dionola samtang padulong siya sa National Highway sa Yati, Liloan pag-abot sa eskina wala na mopaak ang iyang break hinungdan nga milahos kini ug midaro sa duha ka mga PUJ.

Ang mga biktima nga si Embodo ug Olivar gisuwayan og dala sa Vicente Sotto Memorial Medical Center apan gideklarar kini nga patay, samtang si Togado anaa sa kritikal nga kahimtang human kini mahiagum og mga samad ug bun-og sa kalawasan atol sa maong disgrasya.

Samtang si Dionola mitahan sa kapolisan sa Liloan ug andam kini nga moabaga sa galastuhan sa mga biktima, apan padayon pa kining gibilango sa Liloan Police station samtang gihikay pa ang kasong ipasaka batok kang Rico Dionola.