Duha ka speed cops sa convoys misampak sa road barrier gahapon

Duha ka mga speed cops escorts sa Traffic Management Group nga attached sa Presidential Security Group ang nisampak sa barrier atol sa gipahigayong dry-run alang sa umaabot nga 12th ASEAN Summit sa dalan Plaridel ug Ouano Avenue sa Mandaue kagahapon sa buntag.

Ang nadisgrasya mao sila si PO1 Teddy Flaga ug PO1 Arcadio Bool,Police Regional Office-4B ug PRO4-A sa Calabarson kinsa parehong nag-escort sa convoy sa Cambodia gikan sa Shangri-la Hotel and Resort sa Lapulapu.

Matud pa ni PO1 Plaga sa pakighinabi sa Banat News dunay usa ka motorsiklong sibilyan ang misikit kaniya diha sa maong eskina dihang iyang gisenyasan padaplin wala kini mopatuo ug misabay hinuon sa iyang pagliko hinungdan nga na-overshoot si Flaga ug misampak sa konkretong barrier.

Si Bool kinsa nagsunod kaniya pagkakita sa nahitabo kang Flaga ug aron di kini niya maligsan mituyo nalang og tumba sa iyang motorsiklo hinungdan sa pagkasadsad nilang duha diha sa barrier.

Si Bool nahiagum og samad sa walang bukton ug gituuhang nabalian sa iyang abaga ug dakong lagom sa tuong bahin sa agtang ug silang duha daling gidala sa Mandaue City Hospital.

"Accident can happen anytime eh, dapat wala naman sigurong dapat sisihin, siguro ingat nalang," asoy pang Bool sa Banat News diha sa tambalanan.

Matud pa ni Supt. William Manzan, hepe sa TMG-4 mitug-an sa Banat News nga iyang irekomendar ang pagpatangtang o ba kaha pagpasibog sa maong mga barrier ingon man pagsilhig sa dalan tungod sa kadaghan sa balas.

Ang convoy nagdagan og 40 ngadto sa 60 kilometro matag oras nianang tungura diha sa maong dapit sakay sa ilang 750cc bigbikes. - Edwin Ian Melecio ug Bong Soriano