Dry-run daghang problemang na-sugatan sa summit task groups

Dunay gihapoy mga kapalpakan ang pagpahigayon sa dry-run sa Asean Summit kagahapon sa buntag hinungdan nga giusab kini pagkahapon aron masolusyonan ang mga problema sama sa trapiko, mga naglabay-labay nga mga tawo ug mga motorsiklo sa ceremonial routes.

Usa sa gisuwayan mao ang pagresponde sa mga tow trucks sa duha ka mga "naaberyang" mga sakyanan sa dalan diha Ibo-Buaya ug sa Marcelo Fernan Bridge una pa opisyal nga sirad-an ang ceremonial routes.

Nakita nga kulang kaayo ang mga tow trucks, sanglit naabtan nalang sa convoys ang maong mga sakyanan wala pa gihapon sila maugkat.

Laing nabantayan mao ang paglabang-labang sa mga tawo bisan nagpadulong na ang convoys, dunay mga sakyanan nga misubay gihapon sa ceremonial routes bisan sirado na, dunay mga motorsiklong sibilyan nga nakigdungan pa sa convoys, gani miresulta kini sa pagkadisgrasya sa duha ka speed cops.

Samtang nangatanggong usab ang ubang mga PUJ sa habig sa Sugbo duol sa ceremonial routes, dunay mga critical areas nga kulang kaayo og polis hinungdan nga nakasulod ang ubang mga pribadong sakyanan.

Dunay convoy na usab nga nasaag tungod kay ang orihinal nga drivers dili na mao sa unang dry-run, escort cops ug protocol officers niadtong Disyembre ug usa pa ang wala pagkasinabot dayon sa mensahe kung mobiya o dili pa hinungdan nga ang convoy sa Laos nalangay og diyutay apan nakaapas ra gihapon.

Nasuta nga wala makadawat sa instruction ang lead escort gikan sa ilang radyo.Mao usab kini ang hinungdan nga dunay mga parte sa ceremonial routes ang naulahi sa pag-abli usab sa dalan aron maagian sa mga motorista.

Samtang 41 ka mga security cameras nga gimuntar sa ceremonial routes gisuwayan usab apan nasayran nga wala pay mga technical crew nga mi-operate niini kagahapon tungod kay wala sila makaabot sa tukmang oras, naobserbahan usab sa mga tigbalita ang dunay mga security cameras nga natabunan sa mga dayan-dayan sa dalan.

Apan sa kinatibuk-an gihulagway ni Police Regional Office 7 director Silverio Alarcio Jr. nga malampuson ang dry-run sanglit nahimo nila ang pagsirado ug pagbukas sa mga ceremonial routes nga wala maabti og usa ka oras.

Opisyal nga gipasirad-an ang dalan gikan sa Shangri-la Hotel and Resort alas 9:10 ug subling gibuksan sa motorista alas 9:35, samtang sa Sugbo gikan sa Marco Polo Hotel gisirad-an ang dalan alas 9:25 ug subling gibuksan alas 9:50, hinuon giangkon ni Alarcio nga dunay ubang parte sa ceremonial routes ang nalangay og abli tungod sa nasinating problema sa pagpasa sa komunikasyon.

Karong adlawa ibutang na ang kapolisan sa full-alert sanglit magsugod na og pangabot ang mga miyembro sa delegasyon sa ubang nasud ug ugmang adlawa ang mga ministro ug pagka-petsa 12 mao na ang mga heads of states ang moabot.