Si Arcelya Abatayo, 33 anyos, taga Sitio Sombrea Barangay Lawaan II, inahan ni Chello kinsa usa sa mga nabiktima ug Lydia Obejero, 39, taga Mohon iyaan ni Maria Lou kinsa usa usab sa nalanag ang mibutyag kagahapon sa Banat News nga gibati og panakit sa tiyan og dayon misuka ang mga biktima human kini makakaon sa palitaw.
Matud ni Abatayo ug Obejera nga posibleng dunay nasagol sa asukar nga gibalibod sa palitaw tungod kay lain kini og lasa o lami.
Ang 18 ka mga pupils nadangat sa Talisay District Hospital mga alas 10:45 sa buntag ug gipagawas usab dayon kini sa doktor.
Si Chello ug Maria Lou ulahing nadangat sa tambalanan tungod kay ulahi usab ang duha nakasinati og sakit sa tiyan.
Matud ni Abatayo ug Obrejera nga human makasuka si Chello ug Maria Lou nawagtang na ang panakit sa tiyan sa duha apan ila gyud kining gidala sa tambalanan tungod kay namuwa ang mga nawong niini nga pareha og hubog.
Si PO3 Edwin Alvarado polis sa Talisay kinsa usa sa mipahigayon og imbestigasyon sa insidente mibutyag kagahapon sa Banat News nga ang mga biktima ni Mrs. Gleceria Abellanosa.
Usa sa mga ginikanan sa mga pupils ni Abellanosa ang magsuplayan kaniya og mga makaon lakip na niini ang palitaw nga ibaligya og piso matag-usa.
Apan napakyas ang mga polis sa pagkuha og ngalan sa tigsuplay sa maong makaon tungod kay si Abellanosa wala usab makaila niini.
Si Konsehal Richel Bacaltos tsirman sa edukasyon nagkanayon sa pakighinabi niinis sa Banat News kagahapon sa hapon nga mipahigayon na siya og imbestigasyon sa maong insidente.