Lain nga dry-run sa Asean Summit sugdan karon

Sugdan karong alas 8 sa buntag ang pagpahigayon sa dry-run alang sa Asean Summit nga langkuban sa tanang task force committees alang sa maong international nga kalihukan.

Si Chief Supt. Silverio Alarcio Jr. ang direktor sa Police Regional Office 7 ug maoy Security Task Force-Cebu sa summit mitug-an nga bisan dautan ang panahon ihinayon gyud ang dry-run.

Ang ceremonial routes nga maapektahan mao ang mga dalan gikan sa Marco Polo Hotel, Shangri-la Hotel and Resort, Mariott Hotel, Waterfront Hotel and Casino sa Lahug padulong sa CICC sa Mandaue.

Kining mga dapit pasirad-an sa trapiko diin sugdan dayon ang mga pasado alas 8 na apan di kini moabot sa alas 10 sa buntag depende sa dagan sa dry-run, matud pang Alarcio.

Giklaro sa opisyal nga paninguhaon sa National Organizing Committee ug sa Task Force Security ug sa trapiko nga mabuksan dayon ang ceremonial routes sa wala pay usa ka oras.

Karong adlawa usab susihon kung epektibo ang gimuntar nga 41 ka mga security cameras diha sa maong dapit diin kini obserbahan sa mga monitor diha sa Tactical Operations Center sa kapolisan.

Usa sa praktison og maayo mao ang sequencing ug timing sa matag convoy gikan sa hotel ngadto na sa CICC, suwayan usab kung epektibo ang paaging buksan ang pikas dalan padulong sa airport sa Lapu-Lapu alang sa mga pasahero, human dunay usa ka pasahero niadtong milabay'ng dry-run sa Disyembre ang wala makasakay tungod sa dry-run, lakip na ang pagbukas sa dalan sa Benito Ebuen Airbase, aron kaagian sa mga pasahero atol unya sa pagsira sa ceremonial routes.

Dunay helicopter nga moobserbar sa tanang kalihukan ugma aron paghimo og dugang komento sa dagan sa dry-run ilabi na diha sa mga choke points.

Matud pang Alarcio nga kun walay moaging convoy mahimong makalabang ang mga motorista.