Base sa mga ulahing insidente sa pagpanulis dinhi sa Sugbo, ulahing labing dakong gitulis mao ang bangko sa EastWest Bank nga kaduha na higayon niadtong tuig 2005.
Si Supt. Pablo Labra, hepe sa Criminal Investigation and Intelligence Branch sa Cebu City Police Office nagkanayon nga gumikan sa pagsunod sa mga dagkong establisamento ug mga bangko sa pahimangno sa kapolisan kabahin sa ilang seguridad nakatabang kini og dako aron mapugngan ang mga plano sa mga bigtime nga grupo sa mga tulisan.
Apan kung ang sektor sa mga dagkong negosyo naprotektahan sa ilang dugang mga gwardiya, mga security camera ug burglar alarms, ang mga gagmay'ng lending firms ug ubang mga financial institutions na usab ang gibiktima karon.
Base sa rekord sa CCPO ning tuiga, duha na ka mga lending firms ang gitulis sa mga nagsakay og motorsiklo kini ang Yusay Credit and Finance Corporations diha sa dalan Gorordo Avenue ug ang Natco People's Cooperative sa Talamban.
Hinuon sa duha ka insidente, pulos na nailhan ang mga suspek ug napasakaan na og kaso, giila ang mga suspek nga sila si Ronillo Nuñez ug Doroteo Imperial, ang duha gipasanginlang maoy mitulis sa Yusay.
Samtang diha sa insidente sa Talamban, napasakaan na usab og kaso sila si Joel Sumabong ug kauban niining si Efren Beladas.
Si Sumabong maoy usa sa mga gitumbok nga nangulo sa pagpanulis sa Land Bank of the Philippines sa Bogo niadtong 2005 diin kapin P9 milyones ang nadala.
Matud pang Labra gikinahanglan nga sundon sa mga gagmay'ng negosyante ang rekomendasyon sa kapolisan sa pagsiguro sa ilang seguridad.
Nunot niini gikatakdang pakigkitaan ni Labra ang mga tag-iya sa maong gagmay'ng lending firms ug ubang establisamento aron hisgutan ug awhagon sila sa pagsunod sa gihimo sa mga dagkong negosyante.
Nabantayan usab sa kapolisan ang pagusab-usab og modus operandi sa ubang mga tulisan diha sa kadalanan pinaagi sa paggamit na og mga motorsiklo bisan sa pagtulis ug PUJ, pagpanglabni ug uban pa.