3 ka armadong tawo nadakpan sa Daanbantayan, 7 gipangita

Tulo sa napulo ka mga armadong lalaki nga gituohang pulos nagdala ug mugbo nga kalibre sa armas ang nadakpan sa kapolisan sa miaging gabii didto sa usa ka vidiokihan sa Tominjao Daanbantayan Cebu.

Ang kapolisan nakadawat og report gikan sa usa ka concerned citizened kalabot sa mga armadong mga lalaki sa nahisgutang lugar.

Gihimo gilayon ang maong operation sa kapolisan nga gipangulohan ni SPO1 Alburo, PO1 Coyoca, ug PO1 Magdadaro inabagan ni Tominjao barangay kapitan Isidro Rodrigo ug mga sakop sa Barangay Intelligence Network.

Ang mga nasikop mao sila si Nelson Mondejar, Joseph Orongan ug Erwin Arribado pulos hingkod ug residente sa Sitio Jubot, Talisay Daanbantayan.

Ang tulo parehong nakuhaan sa ilang posisyon ug tagsa ka 38 kalibre nga armas ug mga buhing bala.

Matud sa kapolisan ang tulo uban sa laing pito ka mga lalaki ang nanag-inom samtang nagkanta sa videokihan nga gipanag-iya ni Jovita Trangia.

Sa dihang ang grupo sa mga polis mipaila sa tag-iya sa tindahan apan ang napulo ka mga lalaki nangabungkag sa gilingkoran ug daling nakadagan.

Walay suwerte ang tulo kay nasikop sa mga polis ug BIN diha na sa gawas sa videokihan.

"Iko-confirm pa natin yung grupo nato, naa pay laing grupo katong pito, posible mga armado ni sila, nganong nanagan man pag-abot sa mga polis"matud ni P/Insp. Jovito Canlapan hepe sa maong lungsod.

Ang tulo ka dinakpan gipaabot nga pasakaan ug kasong paghupot sa armas nga walay lisensya.

Sa iyang bahin si Daanbantayan mayor Maria Luisa Loot miingon nga wala pa siya makakuha sa kompletong detalye.

Sa pakighinabi kaniya sa Banat News sa telepono kagahapon naatol nga diha siya sa Provincial Capitol.

Sa nasayran nitumaw ang tensyon sa pipila ka mga lomulopyo sa pipila usab ka barangay sa maong lungsod dihang may nakit-an mga armadong tawo nga magsuroy-suroy panahon sa kagabhion nga gituohang mga bata-bata sa nagplanong molansar sa umaabot eleksyon kontra sa pamilyang Loot.