Mga polis di paapil-apilon sa politika karon eleksiyon

Gipahimangnoan ni Police Regional Office 7 direktor Silverio Alarcio, Jr. ang mga sakop sa kapolisan sa dili pag-apil sa politikanhong kalihukan karong umaabot nga eleksyon gawas lang sa pagbotar.

Si Alarcio sa pakighinabi sa mga tigbalita kagahapon nagkanayon nga gidili sa balaod ang mga polis ug militar sa pag-apil sa kalihukang politikal ilabi na ang pagpagamit ngadto sa mga kandidato.

Matud pang Alarcio kadtong mga polis nga dunay mga kabanay nga mokandidato sa eleksyon karong Mayo 11 angayang mopahibalo na ngadto sa ilang kadagkoan aron ibalhin destino layo sa lugar diin mokandidato ang ilang paryente.

"We can't participate in bipartisan political activity, what we can only do is to vote and of course we will be providing security but with the authority of the Comelec," asoy pa ni Alarcio.

Pipila palang ka adlaw ang milabay, si Cebu Provincial Police Office director, Sr.Supt. Vicente Loot mipahibalo na nga mobiya sa iyang pwesto tungod sa nagsingabot nga eleksyon diin ang iyang kapikas nga si Daanbantayan mayor Maria Luisa Loot ug hinablos nga anak nga si Sunsun Shimura modagan pagkamayor ug bise-mayor.

Matud pang Alarcio nga panahon sa eleksyon bugtong ang Commission on Election ray dunay gahum ug bisan ang militar ug kapolisan adto pa mangayo og awtorisasyon sa tanang pagpabalhin, special permit sa mga armas ug bodyguard nga mga polis niadtong mga kandidatong dunay mga hulga sa kinabuhi.