Nadawat sa mga staff ni Mayor Tomas Osmeña sa City Hall ang report sa maong landslide alas 12 pasado sa udto.
Si Konsehal Gerardo Carillo, action officer sa Cebu City Disaster Coordinating Council (CCDCC) daling mimando sa Department of Engineering and Public Works (DEPW) sa pagpadala og ekipo nga makahawan sa dalan nga natabunan sa nidahili nga yuta.
Sa pagpakighinabi ning tigbalita ngadto kang Carillo sa cellular phone kagahapon sa alas 2 pasado sa hapon gipadayag niini nga wala silay nadawat nga report nga dunay panimalay o ba kaha mga tawo nga apektado sa maong pagdahili sa yuta.
Nunot niini, subling nanawagan ang konsehal ngadto sa mga pamilya ilabi na kadtong mga nagpuyo daplin sa sapa nga magmatngon ug kun mahimo temporaryong mobakwit sa mas luwas nga lugar aron malikay sa trahedya sa baha.
Hinuon giklaro sa konsehal nga sukad kagahapon wala pa silay mga pamilya nga nagpuyo daplin sa sapa nga gipugos sa pagpabakwit tungod kay nag-agad sila sa Barangay Disaster Coordinating Council nga maoy gitahasan pagsusi sa sitwasyon sa mga molupyo sa tagsatagsa niini ka lugar. Trabaho pabiling normal atol sa summit Ni Darrel Carumba
Magpabiling normal ang trabaho sa pipila ka mga buhatan sa siyudad sa Sugbo bisan sa deklarasyon nga holiday sa tanang mga buhatan sa gobyerno ug mga tunghaan dinhi sa dakbayan sa Sugbo, Mandaue ug Lapulapu atol sa 12th Asean Summit nga ipahigayon karong Enero 12 hangtud sa 15.
Subay sa rekomendasyon sa National Organizing Committee ngadto kang Presidente Gloria Arroyo ang petsa 12 adlaw'ng Biyernes ug ang petsa 15 Lunes maoy gideklarar nga holiday ug ang petsa 13 og 14 nga adlaw'ng Sabado ug Domingo pabiling normal.
Apan ang mga buhatan lang sa gobyerno maoy makabenepisyo sa maong holiday tungod kay pabiling regular ang trabaho sa mga pribadong sektor gawas lang nga kanselado ang tanang klase sa mga pampubliko ug pribadong tunghaan dinhi sa siyudad sa Sugbo, Lapulapu ug Mandaue.
Si City Administrator Francisco Fernandez una nang miluwat og direktiba ngadto sa mga kawani sa City Hall niadto pang wala ma-postpone ang orihinal nga schedule sa Asean Summit niadtong Disyembre 11 hangtod sa 14 sa miaging bulan sa Disyembre nga pabiling regular ug normal ang operasyon sa ubang mga departamento sa City Hall.
Gitumbok niya ang mga sensitibo nga departamento sa City Hall ang sa Cebu City Medical Center (CCMC),City Traffic Operation Management (Citom), Department of Engineering and Public Works (DEPW) ug Department of Public Services (DPS).
Gibutyag ni Fernandez nga dili mahimong kanselahon ang operasyon niining nahisgutang mga buhatan gumikan kay mao kini gitahasan sa mga basic services sama sa pag-atiman sa mga madangat nga pasyinte sa maong publikong tambalanan, pagpatunhay sa trapiko ug ang pag-atiman sa paghakot sa mga basura.