Lawas sa mananagat nabungkag

Nabungkag ang kalawasan sa usa ka mananagat uban sa giluwanan niining sakayan dihang ang dinamita nga gidagkotan nga gitumong unta sa nagpanon nga mga isda kalit lang mibuto nga wala ikalabay sa dagat.

Nahitabo ang maong aksidente alas 2 pasado ang takna sa hapon sa miaging Sabado sa kadagatan sa sitio Looc, Tayud, Consolacion.

Ang biktima mao si Armando Pepito, 43 anyos, minyo ug usa ka mananagat nga nagpuyo sa nahisgotang lungsod.

Si SPO1 Ricardo Pepito sa kapolisan sa nahisgotang lungsod nga gikahinabi sa Banat News miingon nga ang maong hitabo unang gikataho sa kapolisan sa lungsod sa Liloan.

Matud pa ni SPO1 Ermac nga gihimo nila ang pagpangita kuyog sa mga mananagat sa maong dapit apan hangtod sa pagtikyop sa kangitngit wala gayud kini nila igkita.

Sumala pa niya nga alas 8 pasado na ang takna kagahapon sa buntag sa Domingo nga napalgan ang nabungkag nga patay'ng lawas nga milutaw na sa dagat.

Sa asoy sa asawa sa biktima nga nadasig ang biktima sa pagpanagat niadtong Sabado sa hapon dihang nasayran gikan sa kauban niining mananagat ang pagpakita sa daghang isda sa kadagatan sa maong dapit.

Sa dugang asoy sa asawa ngadto kaniya iyang nahibaw-an nga ang pagpanagat nga gamiton ang dinamita dugay na nga gihimo sa biktima hangtod nga wala lang damhang nakasinati kini og aksidente.