Si Talisay City Veterinarian Galileo Larawan mibutyag kagahapon sa Banat News nga kung aduna silay mga yangongo kabahin sa operasyon sa ihawan dili dayon sila mahatagan sa pagtagad diin makabalda kini sa ilang operasyon.
Niining bag-o lang si Larawan mihangyo sa siyudad nga mokuha og dugang job order para himuong hauler o tigpas-an sa mga hayop nga maihaw nga i-deliver diha sa merkado apan ang ipadala hinuong mga tawo sa ihawan ang para hinoon idestino sa opisina.
Matud sa city veterinarian nga kung adunay makina usab nga maguba magmano-mano sila sa ilang trabaho diin nakasamot usab kini og padugay sa operasyon.
Niining bag-o lang nakasinati og dakong problema ang ihawan tungod sa pagkaguba sa boiler niini sulod na sa lima ka adlaw.
Si Larawan mibutyag usab nga nauwaw na siya sa supplier nila sa mga stainless steel nga bitayanan sa mga karne, tungod kay siya maoy sigehan og paningil niini.
Niadtong Hunyo mipalit og 100 ka bitayanan ang siyudad nga mikabat og P700,000 apan hangtud karon wala pa mabayari.
Si Larawan midugang nga sukad niadtong 2004 nagkasaka ang abot sa ihawan diin mikabat na sa P1 milyones matag buwan ang abot niini o gilauman nga mosaka pa gyud kini.
Nanghinaot ang opisyal nga mahatagan dayon sila og pagtagad sa kagamhanan sa siyudad sa ilang mga yangongo aron dili mabalda ang ilang operasyon ug dili maapektohan ang abot sa siyudad.