Mga taga Olango nakadawat og libreng serbisyo sa Centcom

Dul-an sa usa ka libo ka mga residente sa Isla sa Olango, siyudad sa Lapulapu ang nakabenepisyo sa gipahigayong medical and dental mission sa miaging adlaw nga gipasiugdahan sa Central Command, 3rd Civil Relation Group, Civil Relation Service.

Sa press release nga gipadala, dunay 962 ka mga tawo ang nakapahimulos og libreng serbisyo, nakadawat ug libreng tambal ilabi na niadtong dunay gipamati nga sakit dihang gipahigayon sa barangay hall sa Olango ang medical mission.

Ang medical ug dental mission sa Central Command giabagan usab sa marine red unit nga gipangulohan ni Lt. Col. Martin Pinto ug ang mga sakop sa Non Government Organization ingon man ang lokal nga kagamhanan sa Lapulapu.

Ang maong kalihokan gituyo aron mapaabot ngadto sa mga katawhan sa Isla sa Olango ang basic services ilabi na sa mga lungsoranon.

Gituyo ang maong kalihokan sa mga kadagkuan sa central Command aron pag-establisar og relasyon sa gobyerno ug sa katawhan.

Ang mga residente sa Olango mihangop sa maong kalihokan ug mipadayag sa ilang kalipay ngadto sa mga militar nga maoy nagpasiugda niini.

Gikonsiderar ni Lt. Col Oscar Lasangue, group commander sa Centcom nga kalampusan sa Armed Forces ug Non Government Organizations ang maong kalihukan.