Niadtong milabay'ng gabii, usa ka pasaheroan nga jeep na usab gikan sa Talamban nga padulong sa downtown ang gitulis sa duha ka wala mailhing mga armadong lalaki nga dunay back-up nga nagmotor.
Gihimulbulan sa ilang mga butang ang mga biktimang sila si Annie Manlangit, 20, taga Nasipit, Talamban; Milmar Salienda,19, taga dalan Gil Tudtud sa Mabolo ug Leslie Sienes, 23, taga dalan Bonifacio sa lungsod sa Naga.
Sumala pa sa imbestigasyon sa Theft and Robbery Section luwan ang mga biktima sa PUJ gikan sa Talamban padulong na sa Ayala dihang pag-abot duol sa may Cebu Country Club sa dalan Archbishop Reyes kalit nga mideklarar og tulis ang duha dayong tion og mga wala matinong kalibre sa armas.
Gumikan sa kahadlok nga dunay dautang mahitabo kanila gihatag sa mga biktima ang duha ka shoulder bag nga iya nila ni Manlangit ug Salienda.
Ang bag ni Manlangit may sulod 1110 Nokia cellphone nga nagkantidad og P2,290 ug ang bag ni Salienda dunay sulod nga mga yawe, personal nga gamit ug P200, gikuha usab sa mga suspek ang cellphone ni Sienes nga Nokia 6610 nga nagkantidad og P6,000.
Human niini daling nanganaog ang mga suspek ug misakay sa usa ka motorsiklong mihunong sa ilang luyo nga gimaneho sa usa pa ka lalaki dayong sutoy og padagan palayo.
Kagahapon sa buntag, usa ka Indian national nga si Paransip Singh, 34, nga taga dalan U.N. Avenue sa Seno, Mandaue ang nabiktima usab sa duha ka tulisan nga luwan og motorsiklo diha sa Sunrise Village sa Pardo.
Matud pang SPO4 Jaime Repompo nga kalit nga gibabagan sa motorsiklo sa mga suspek ang motorsiklo sa biktima dayong naog sa backrider ug mition og wala matinong kalibre sa armas ug gikuha ang iyang nakolektang P7,000.
Matud pa sa biktima kolor itom nga motorsiklo TMX nga may plakang GY-3267 ang gigamit sa mga suspek.