Videoke higpitan sa city hall sukad karon

Gimanduan ang mga opisyal sa kabarangayan alang sa hugtanong pagpatuman karong tuiga sa ordinansa sa siyudad nga nag-regulate sa videoke ug karaoke machines dinhi sa dakbayan sa Sugbo.

Si Konsehal Arsenio Pacaña mopasar og resolusyon atol sa sesyon sa konseho karong sunod semana aron ipatuman ang maong lakang agi og tubag sa daghang reklamo nga nadawat sa konsehal batok ning pagkatap karon sa mga videoke ug karaoke machines nga nakabalda ang grabeng kasaba niini ilabi na panahon sa kagabhion.

Tungod niini gitinguha sa konsehal nga hugtanong mapatuman karong tuiga ang City Ordinance No.1940 nga gitawag og "An Ordinance Regulating the Operation of Video Karaoke Machines/Units dinhi sa dakbayan.

Ubos niining maong ordinansa walay mga tindahan ug bisan unsang establisemanto dinhi sa dakbayan ang gitugotan nga maka-operate og videoke machines kun walay barangay clearance nga maoy usa sa mga gikinahanglan aron ma-isyuhan og mayor's permit sa City Hall ang maong operator niini.

Nalatid ubos usab sa maong ordinansa sa siyudad nga gidili ang pag-operate og mga videoke machines sa mga lugar nga gikonsiderar nga residential zones subay sa lagda nga nalatid sa Zoning Ordinance.

Nasayran nga pagkakaron misamot kadaghan ang mga tindahan ilabi na kadtong mga imnanan nga nag-abang og mga videoke machines nga maoy sagad lingawlingawan sa pagkanta sa mga kustomer niining mag-inom tungod kay maabot kaayo ang tag P5 nga bayad sa matag kanta niini.

Matud ni Pacaña giatol niya niining bulan sa Enero ang rekomendasyon alang sa hugtanong pagpatuman sa maong ordinansa gumikan kay karong higayona mao man ang naandan nga ting- renew sa mga business permit ug obligado na usab nga molukat og barangay clearance ang maong mga tindahan og imnanan sa barangay diin kini mahisakop aron katugotan kining makapadayon og operate karong tuiga.