Biyuda gidasmaga'g trak sa bombero nalagpot-patay

Naghoguros nga mini-firetruck sa barangay Tejero midaro sa usa ka biyuda- patay diha sa dalan Jakosalem duol sa buhatan sa City hall sa dakbayan sa Sugbo niadtong milabay'ng adlaw.

Ang namatay giilang si Felicula Caga-anan Tuozo, residente sa dalan Junquera sa Camagayan ning dakbayan kinsa milabang unta diha sa maong dalan pangadto sa buhatan sa dakbayan.

Mitahan ra hinuon ang drayber nga si Emmanuel Hernani, 50, ngadto sa buhatan sa Traffic Group nianang pagkahapon human masayring namatay ang biktima pila ka oras human madala sa Cebu City Medical Center.

Sa imbestigasyon ni SPO1 Nelson Jayme sa TG, nasuta nga kusog ang dagan sa mini-firetruck nga may plakang YBB-524 diha sa maong dapit dihang sa pagtabok sa biktima nasungag kini.

Tungod sa kakusog sa pagsampok sa trak nalagpot og pipila ka metros ang biktima hinungdan sa grabeng kadaut nga nahiaguman diha sa kalawasan ug sa ulo.

Kasong reckless imprudence resulting to homicide ang gikatakdang ipasaka batok sa suspek.