Asawa gipatay sa bana tungod sa P10

Usa ka asawa ang gipatay sa iyang bana tungod lang sa P10 atubangan sa ilang lima ka mga anak pinaagi sa pagdunggab sa makadaghang higayon sulod sa ilang panimalay human sa panaglalis.

Nahitabo kini pasado alas 4 sa miaging hapon sa Sitio Ok-ok, Pangdan, Naga.

Ang namatay giila sa kapolisan nga mao si Celsa Aliganga 33, samtang ang bana nga midunggab mao si Erman 40 anyos ang panuigon, usa ka mag-uuma ug residente sa naasoy'ng lugar.

Ang biktima nakaangkon og daghang samad dinunggaban sa nagkadaiyang parte sa kalawasan nga maoy nakaingon sa pagkamatay dihadiha gamit ang kutsilyo.

Segun sa report sa kapolisan sa wala pa mahitabo ang pagpanunggab, ang bana miingon ngadto sa asawa nga naay tawo nga gustong mopatay kaniya.

Pagka alas 4 sa hapon mihangyo ang bana nga mosimba ngadto sa simbahan sa Naga apan gibalibaran sa asawa nga dili na lang pasimbahon kay P10 ra ang kuwarta ug dili paigo nga iplete sa sakyanan.

Diha-diha nasuko ang bana ug maoy sinugdanan sa ilang panaglalis.

Daling mikuha ang bana og kutsilyo sa kusina ug gidunggab ang asawa sa makadaghan nga diha ang ilang mga anak.

"Confirmed gyud ni siya, (bana) dunay result sa medical certificate nga suffering from lunatic nervous breakdown," asoy ni SPO1 Bienvenido Delos Santos sa Naga Police.

Matud niya nga nianang pagka gabii ang ulo sa gikatahapan giparok-parok sa semento sulod sa prisohan, apan maayo na lang gani kay nabantayan kini sa kaubang piniriso ug napugngan ra kini.

Suma pa ni SPO1 Delos Santos nga wala pay mipatim-aw sa ilang buhatan sa mga kabanay sa gipatay hinungdan nga wala pa nila mapasaka ang kasong parricide ngadto sa piskaliya.