Wala pay papilian nga hulip ni Loot

Wa pay mga pangan ang mitumaw nga maoy pilian nga mohulip sa hepe sa kapolisan sa probinsiya sa Sugbo human sa Asean Summit.

Atol sa press conference sa miaging adlaw, mismo si Chief Supt. Silverio Alarcio Jr. hepe sa kapolisan sa Central Visayas wala pa mokompirmar kung kinsa gyud ang mohulip ni P/Sr. Supt. Vicente Loot sa CPPO.

Hinuon matud ni Alarcio kasamtangan pang gitimbang-timbang sa Gobernador sa probinsiya sa Sugbo, Gwendolyn Garcia kung kinsa ang pilion nga opisyal gikan sa PRO-7.

Si Alarcio wala sad mobutyag sa mga pangan sa opisyal nga iyang giindosar ngadto sa gobernador.

Human sa Asean Summit, si Loot hulipan na sa iyang pagka hepe sa CPPO.

Giklaro ni Alarcio nga wala pay kamanduan nga iyang nadawat gikan sa ulohang buhatan nga buot nang balhinon si Loot ngadto sa laing buhatan.

Sa sayo pa si Loot una nang mipadayag nga gustong magpabalhin tungod kay ang iyang asawa nga si Daan Bantayan incumbent mayor Maria Luisa Loot ug ang anak niining si Sun-Sun Shimura buot magpapili pagka mayor samtang si mayor maoy mo-bise mayor sa iyang anak sa umaabot nga eleksyon karong bulan sa Mayo.

Matud ni Alarcio nga puwede magpa transfer si Loot apan kinahanglan kining dunay pagtugot gikan sa Comelec.

Gikatahong duna nay lima ka mga pangan sa opisyal ang nitumaw nga susama ug ranggo ni Loot gikan sa Police Regional Office 7 nga kuwalipikado usab sa posisyon.

Dugang pang Alarcio kun dili makapaabot sa order si Loot gikan sa ulohang buhatan sa iyang bag-ong assignment ug iya kining biyaan, mapugos siya ug tudlo isip Officer in Charge sa CPPO aron kasamtangan maoy modumala niini.