Alarm system sa CH napalpak

Ipa-imbestigar ni Mayor Tomas Osmeña ang pagkapalpak sa pag-operate sa Mobile Alarm Response System (MARS) ang modernong alarm system sa dakbayan sa Sugbo atol sa nahitabong pagpanulis sa Yusay Credit and Finance Corporation sa may dalan Gorordo Avenue niadtong milabay'ng Martes.

Si Osmeña wala mahimuot nga wala maka-operate ang maong modernong alarm system nga gitumong aron pagsumpo sa bisan unsa nga motumaw nga krimen dinhi sa dakbayan ilabi na gyud ang mga pagpanulis.

Tungod niini, gimando sa mayor ang imbestigasyon kabahin niini aron mahibaw-an kun unsay hinungdan kun nganong wala mapahimusli ang maong alarm system dihang mitumaw ang labing una nga pagpanulis dinhi sa dakbayan karong tuiga.

Hinuon medyo nakuhakuhaan og gamay ang kasuko sa mayor human positibo nga nadakpan sa kapolisan ubos sa pagdumala karon sa bag-ong hepe sa Cebu City Police Office Sr. Supt. Patricinio Comendador sa usa sa duha ka mga suspek nga si Ronelo Nuñez atol sa hot pursuit operation didto sa Maslog, Danao.

Samtang si Konsehal Augustus Pe Jr. mipadayag nga dili pa sila makasugod sa maong imbestigasyon gumikan kay wala pa siya makadawat og opisyal nga kamanduan gikan sa mayor nga nagmando sa pag-imbestigar sa nahitabung pagkapalpak sa maong alarm system.

Gipasalig hinuon sa konsehal nga sugdan dayun ang maong imbistigasyon kon makadawat na siya og direktiba gikan sa buhatan sa mayor.

Ang maong alarm system gimugna sa dakbayan aron makapahibalo dayon ang tanang mga financial institution sama sa bangko, pawnshop, lending firm ug uban pang establisamento ngadto sa kapolisan kun makasinati kini og pagpanulis pinaagi lang sa pagpindot sa cellphone niini nga naka-online ngadto sa buhatan sa kapolisan.