Magtiayon gipusil sa pag-umangkon

Managtiayon gipusil sa ilang pag-umangkon gumikan lang sa ilang utang nga wala mabayri niadtong milabay'ng adlaw diha sa sitio Taytayan, Buhisan ning dakbayan.

Ang mga biktima nga parehong nalandig sa tambalanan giilang sila si Reynaldo, 45, ug asawa niining si Lourdes Pahamutang,44, pulos residente sa maong lugar.

Ang suspek kinsa daling miikyas human sa pagpamusil giilang si Mark Bert Ramirez, 26, pag-umangkon ni Lourdes.

Sa imbestigasyon ni SPO2 Rey Cuyos sa Homicide Section gikatahong kasamtangang nagduwa og mahjong si Reynaldo diha sa panimalay sa ilang silingang si Felix Gingoyon, samtang nagtan-aw si Lourdes niadtong tungora dihang miabot si Ramirez.

Giingong gipaningil ni Ramirez ang utang nga P2 mil sa magtiayon niadto pang milabay'ng bulan sa Nobiyembre sa milabay'ng tuig apan walay ikabayad ang duha ug misaad nga mabayran lang nila ni kung makapadala og kwarta ang ilang paryenteng tua magtrabaho sa abroad.

Ning tungora kalit nga milakaw ang suspek ug dangtan pila ka gutlo mibalik kini nga nagbitbit na og kalibre 38 rebolber dayong walay daghang pangutana gipamusil ang matiayon sa makadaghang higayon.

Si Lourdes naigo diha sa walang sampot samtang sa tuong sampot, usab naigo ang bana niini, hinuon ang ubang kaduwa sa mahjong sa mga biktima daling nakadagan palayo.

Wala na maabti sa mga mirespondeng mga polis si Ramirez samtang daling gidala ang magtiayon sa Cebu City Medical Center ug luwas na ang kahimtang.