Si Dennis Illiot, 24, Accountancy graduate sa UP Diliman, lumad nga taga Lamanok, Merida, Leyte, ug kasamtangang nagpuyo sa usa ka apartment sa dalan Joaquino, Mabolo ning dakbayan, nadakpan kagahapon sa alas 11 sa buntag samtang bitbit ang tiket sa Supercat ubos sa ngalang "Wacky Gaisano."
Nakuhaan si Illiot og pitaka, N73 nga cellphone, relo nga mahalon ug mga yawe.
Usa ka reklamante nga si Buddy Klinar miasoy sa TRS nga nagkita silang Illiot sa Urgello ug gidani nga magduwa sa Extreme Challenge didto sa Shangri la Mactan, apan pag-abot didto gipahubo ang iyang cellphone alahas lakip ang cellphone aron ideposito, apan 30 minutos sukad kini milakaw wala na mobalik.
Si Daniel Tomaquin miingon nga nagka-chat sila ni Illiot. Gisugat niya si Illiot sa pier gikan sa Ormoc. Mahalong cellphone sa igsuon ni Tomaquin ang nadala ni Illiot.
Si Illiot miangkong giilad niya ang duha ug miangkong sakop siya sa sindikato sa pito ka tawo diin duha ang babaye ug kansang lider usa ka Dwin Lareno nga usa ka Tagalog. Rey Pasaporte