60-anyos ug kuyog nga GRO nadakpan sa polis nga nagsuyop

Usa ka 60 anyos nga manager sa usa ka security agency ug ang kuyog niining usa ka Guest Relation Officer (G.R.O.) nga babaye ang nadakpan sa akto sa kapolisan nga nagsuyop og shabu.

Ang pagdakop natigayon sa saturation drive nga gihimo sa usa ka panimalay sa purok Tamarin, Umapad, dakbayan sa Mandaue alas 11 pasado ang takna sa miaging gabii.

Ang nadakpan nila ni PO2 Renato Alondres Jr. sa Presinto 5 sa Opao Police Station mao si Marcelino Casinello Jr., minyo nga nagpuyo sa Pajo, dakbayan sa Mandaue.

Ang kauban ni Casinello nga nadakpan mao si Alicia Alferes, 22 anyos, dalaga ug nagtrabaho isip GRO sa usa ka balay kahilayan sa maong dakbayan.

Nunot sa pagkasikop nila ni Casinello ug Alferes maoy nasakmit nila ni PO2 Alondres ang mga ebidensiya nga naglakip sa upat ka pakete nga gituohang shabu ug mga kahimanan sa paggamit niini.

Si PO2 Alondres miingon nga ang duha ka suspetsado ilang pasakaan og kasong kalapasan sa Republic 9165 kon Comprehensive of Dangerous Drug Act of 2002.

Ang mga ebidensiya nga nasakmit nila ni PO2 Alondres maoy nakapalig-on sa kaso nga ilang gipasaka batok sa duha ka dinakpan kinsa gibalhog na karon sa bilanggoan.