Mga pabuto nasakmit sa mga polis sa Talisay

Kapolisan sa Talisay nakasakmit og mga pabuto sa bisperas sa bag-ong tuig tungod kay ang mga tag-iya niini walay mga permit nga namaligya ug wala usab kini motuman sa ilang gikasabotan tali sa siyudad.

Si Police Superintendent Romeo Perigo, hepe sa kapolisan sa dakbayan, mibutyag kagahapon sa Banat News nga nakasakmit sila og siyam ka sako ug duha ka drum nga nagkalain-laing klase sa pabuto ug lima ka sakong kwitis.

Ang maong mga pabuto naa karon diha sa police station sa barangay Poblacion ug gikatakdang sunogon karong Lunes diha sa dakong hawanan sa city hall human sa flag raising ceremony.

Matud ni Perigo nga ang mga tag-iya sa mga pabuto wala motuman sa ilang gikasabotan tali sa siyudad nga mokuha og permit gikan sa Firearms Explosives Security and Guard Supervision (FESAGS) ug anha moladlad sa ilang mga tinda diha sa designated area diha sa bakanteng luna atubangan sa city hall paglikay sa aksidente.

Ang mga naninda og pabuto kasagaran diha mipahimutang sa ilang mga tinda duol sa mga establisamento ug sikit sa mga balay.

Ang hepe nagkanayon nga naaktohan gyud niya ang usa ka mamaligyaay og pabuto nga diha magladlad kilid sa usa ka dakong tindahan sa Tabunok hinungdan nga iya kining gibadlong ug mitawag siya og gwardiya sa tindahan apan milakaw ang maong namaligya og ang pabuto niini gitagoan ilawom sa sakyanan sa hepe.

Sa laing bahin, si Talisay City Fire Marshal Felipe Canillas nagkanayon kagahapon sa pakighinabi niini sa Banat News nga sa pagsaulog sa holidays niining tuiga angayang hugtan na sa pagbantay ang mga manindahay og pabuto ug angayan nga anha sila maninda sa designated area para paglikay sa aksidente.