Laing tulis, coop ang giigo

Wala pay 24 oras sukad gitulis ang lending firm sa Gorordo Avenue, nausban na usab og laing pagpanulis diin usa ka Kooperatiba ang gitulis sa tulo ka wala mailhing tulisan kagahapon sa buntag diha sa dalan Borbajo, Talamban ning siyudad sa Sugbo.

Kini maoy ikaduhang nahitabong pagpanulis nga miigo sa Sugbo pagsugod sa bulan sa Enero dinhi sa dakbayan sa Sugbo.

Ang gitulis mao ang Natco Network People's Cooperative nga nagbase sa Talamban ning siyudad.

Gibanabanang dul-an sa P60,000 ang kinatibuk-ang kantidad nga nadala sa tulo ka mga tulisan.

Ang usa sa tulo ka tulisan nagtabon sa nawong samtang ang usa nagsul-ob og shades, samtang ang ikatulo may pagka kirat og mata ug tambok ang gidak-on sa panglawas ug pulos armado sa wala pa matino nga kalibre sa armas.

Si Joy Hatamosa, taga MJ Cuenco Avenue ning siyudad, kahera sa maong kooperatiba, mitug-an sa Banat News kagahapon nga samtang siya naglingkod atubangan sa lamesa kalit lang siya nga gitionan sa usa sa tulo ka tulisan nga nagdala'g bag nga itom dayong deklarar og tulis.

"Iya man kong giingnan nga kun dili nako ihatag ang kuwarta iya ming pamusilon og hurot, mao nga nahadlok ko," matud ni Hatamosa.

Ang computer nga diha sa atubangan ni Hatamosa gipanglabnotan sa tulisan og mga wire ug ang usa ka linya sa telepono sa dayon nang sibat sa tulo.

Matud ni Hatamosa nga ang kuwartang nadala sa tulisan mao ang koleksyon niadtong Disyembre 29 sa miaging tuig nga wala nila madeposito sa bangko.

Sa iyang bahin, si Baltazar Eduyan, information officer nga diha sa pultahan sa maong kooperatiba miingon nga nagsunod ang tulo ka tawo nga deretso'g sulod ug nangita ni "Mr. Fernandez".

Sa dihang nakasulod na ang tulo nakakuratan siya human ang usa miingon nga "tulis."

Diha-diha gitapok silang tulo ka empleyado sa may suok nga bahin.

Gani matud ni Eduyan nga nakapabuto pa ang usa ka tulisan human mangutingkay sa mga lamesa sa ilang pagpinangita sa kuwarta.

Nagduda si Eduyan nga posibling miyembro ra sa kooperatiba ang tulisan sanglit suhito kaayo sa gibutangan sa kuwarta.

Human milampos ang tulisan dali kining nakasakay sa mini van nga multicab kolor green ug giingong nanganaog sa Talamban Sports Compex.

Usa ka Miriam Saulo, nanag-iya og tindahan kilid sa maong kooperatiba nga nahinabi usab sa Banat News miingon nga misulod unta siya sa pultahan sa kooperatiba kay iyang ibaligya sa mga empleyado ang sobrang kan-on.

Siya nahibulong dihang iyang giduot ang pultahan apan gipugngan kini sa usa ka tulisan nga nagtaptap sa nawong ug misenyas kaniya nga "ayaw pagsaba."

Sa pagka-karon padayon pang gihimoan og imbestigasyon sa mga sakop sa Theft and Robbery Scetion sa Cebu City Police Office ang maong pagpanulis.

Ang hepe sa Theft and Robbery Section, Sr. Insp. Alexes Relado miingon nga iyang ipaubos sa lie detector test ang mga empleyado sa pagsuta kun dili "inside job" ang maong tulis.