Maid, iro milayat sa 9th floor

Usa ka 42 anyos nga katabang uban ang iyang iro milayat gikan sa ika-siyam nga andana gikan sa condominium unit nga gialagaran niadtong Lunes sa udto diha sa Citylights Garden Condominium sa Veterans Drive, Nivel Hills sa Lahug.

Ang maong babaye giila sa Homicide Section nga mao si Juanita Jayme, lumad nga taga Corazon, lungsod sa Catmon ug nagtrabaho sa usa ka babayeng Amerikana nga si Collete Goldstein sulod sa 17 na ka tuig.

Si Jayme napalgang nagbuy-od sa gwardiyang si Cristulo Desucatan diha na sa usa sa mga garden ubos sa tower 2 sa maong condominium ug maayong pagkagusbat sa ulo ug buko-buko niini.

Uban sa pag-ambak sa biktima mao ang iyang iro nga namatay usab tungod sa dakong kadaut nga nahiaguman.

Matud pang SPO1 Desiderio Mendaros sa pakighinabi sa Banat News wala diha ang agalon ni Jayme nianang pagkahitabo bugtong ang kauban lang niining naila lang sa ngalan nga Daphne.

Gikatahong dugay nang may problema sa pangisip si Jayme ug nadala na usab kini sa usa ka espesyalista sa usa sa mga pribadong tambalanan dinhi sa Sugbo niadtong milabayng Septembre 5 sa milabayng tuig diin kini nadiskubrehang dunay "major depressive disorder with psychiatric features bunga sa pagka-paranoid kon ratolon ug magsige'g huna-huna nga dunay tawong mopatay niya. Matud pa mitumaw kini tungod sa pagsige nila og away sa iyang bana kaniadto pa.

Usa ka suwat nga gikatahong hinimo ni Jayme ang nakit-an diha sa condominium unit niini diin iyang gisugilon nga duna siyay nadunggang mga estorya nga patyon siya ug kini iya nang gitug-an sa iyang kaubang si Daphne.

Ang maong suwat maoy nikumbinsir sa kapolisan sa una nilang pagduda nga duna kini deperensya sa pangisip tungod usab sa pamahayag ni Daphne nga dunay mga higayon nga magsul-ob kini og sapaw-sapaw nga sinina ug usahay molikoy ang tinubagan.

Dunay narekober nga onse ka tag P500 ug duha ka tag P1000 diha sa patay'ng lawas sa biktima.

Aron pagwala sa pagduda, gimando sa kapolisan ang pagpa-awtopsiya sa patay'ng lawas ni Jayme aron tinuon kung duna bay foul play ang kamatayon niini.