Comelec miangkon di kaatiman

Giangkon sa mga opisyal sa Commission on Election (Comelec) nga dili sila makaatiman sa tanang mga bag-ong botante dinhi sa dakbayan sa Sugbo nga nag-ilogay karon sa pagparehistro aron makabotar sa eleksiyon sa Mayo sunod tuig.

Kini tungod kay gawas nga daghan kaayo ang mga bag-ong botante nga nagtinguha nga magparehistro sa Comelec, nadaot usab ang usa sa mga computer niini nga maoy gigamit sa pagpangrehistro.

Matud ni City Comelec Officer for the South Atty. Marcel Sarno, usa na lang ka computer ang aktibo karon nilang gigamit sa registration tungod kay ang usa niini giayo pa karon sa ilang technician.

Ang Comelec South ug North duna kini tag duha ka computer nga gigamit karon sa nagpadayon nga registration.

Niadtong miaging adlaw, miabot og 540 ka mga bag-ong botante ang narehistro sa Comelec North ug laing 500 kapin usab sa Comelec South.

Matud ni Sarno mas taas ang maong figure kun itandi sa gihimo nilang registration niadtong milabay'ng mga adlaw.

Gumikan niini, magpabiling bukas ang buhatan sa Comelec aron sa pagpadayon og pangrehistro karong adlaw'ng Sabado ug Domingo nga maoy deadline gikan sa alas 8:00 sa buntag hangtod sa alas 5:00 sa hapon.

Gibutyag ni Atty. Leonel Marco Castillano nga ila na lang gibalibaran ang 1,200 ka piniriso sa Bagong Buhay Rehabilitation Center (BBRC) nga giaprobahan sa korte nga makaparehistro aron makabotar sa umaabot nga piniliay.

Kini tungod kay matud ni Castillano, tag 50 lang ka piniriso sa matag buhatan sa Comelec matag adlaw ang ilang maatiman tungod sa daghan pang wala ma-rehistro.

Gipasabot ni Castillano nga mahimo pang makabotar sa eleksyon ang si bisan kinsa nga piniriso subay sa balaod basta wala lang kini makonbikto og kasong lapas sa usa ka tuig ang sentensya niini.